Read Boros Dusun KAJADIAN 40 Bible Online

KAJADIAN 40 - Boros Dusun bible

KAJADIAN 40

¹Hiji mangsa, mantri nu ngurus leueuteun jeung mantri nu ngurus katuangan raja Mesir baroga dosa ka gustina.

²Raja pohara benduna ka eta dua ponggawa.

³Duanana diselehkeun ka panjara anu ayana di gedong kapala kawal karaton tea, nu dipake ngerem Yusup.

⁴Ku eta kapala, Yusup dibakukeun purah ngalalayanan aranjeunna. Eta dua ponggawa dipanjarana teh teu wudu lila.

⁵Hiji peuting, eta ponggawa-ponggawa raja Mesir teh ngarimpi, anu pihartieunana teu sarua.

⁶Isukna ku Yusup kasampak keur tingharuleng.

⁷Seug ditaros, ”Ku naon Juragan teh sapertos anu ngarangluh?”

⁸Walonna, ”Puguh tadi peuting ngimpi. Ku taya anu bisa nerangkeun ilapatna.” ”Allah anu maparin katiasa pikeun nerangkeun impi-impian teh,” saur Yusup. ”Cobi carioskeun ngimpen naon.”

⁹Mantri nu ngurus leueuteun raja nyarita, ”Kami ngimpi aya tangkal anggur, ujug-ujug jadi di hareupeun.

¹⁰Dahanna aya tilu, sarta harita keneh daraunan, karembangan, terus baruahan nepi ka asak.

¹¹Ari kami keur nyekel lumur raja, seug anggur teh ku kami dipetik terus diperes kana lumur, geus kitu dihaturkeun ka raja.”

¹²Saur Yusup, ”Tilu dahan hartosna tilu dinten.

¹³Tilu dinten deui Juragan bakal dikaluarkeun, dipaparin ampun ku raja sareng dijenengkeun deui nyepeng damel sapertos tadina, jadi deui mantri nu ngurus leueuteun raja.

¹⁴Saupami Juragan parantos mendak deui kagenahan, mugi sing emut ka sim abdi. Unjukkeun perkawis abdi teh ka raja, manawi jadi lantaran abdi dikaluarkeun ti ieu bui.

¹⁵Sayaktosna abdi teh dipaling ti tanah Ibrani. Ayeuna aya di jero panjara oge sayaktosna mah teu gaduh kalepatan naon-naon.”

¹⁶Ngadenge eta katerangan sakitu genahna, pok mantri nu ngurus katuangan raja oge nyaritakeun impianana, ”Kami mah ngimpi nyuhun tilu tetenong.

¹⁷Dina tetenong nu pangluhurna aya rupa-rupa katuangan hancengan raja. Tapi eta katuangan teh kabeh diparacokan ku manuk.”

¹⁸Saur Yusup, ”Tilu tetenong hartosna tilu dinten.

¹⁹Tilu dinten deui Juragan oge bakal dikaluarkeun, nanging teras dihukum, ditugel mastaka. Salira Juragan bakal digantung di luhur tangkal teras diparacokan ku manuk.”

²⁰Tilu poe ti harita raja ngajamu mantri-mantri, sabab meneran poe weweton anjeunna. Mantri nu ngurus leueuteun jeung mantri nu ngurus katuangan disaur sina ka payuneun mantri-mantri sejenna.

²¹Satuluyna mantri nu ngurus leueuteun dijenengkeun deui.

²²Ari mantri nu ngurus katuangan mah terus digantung, cocog jeung anu diterangkeun ku Yusup.

²³Tapi mantri nu ngurus leueuteun teh ari geus kitu mah lat bae ka Yusup teu inget-inget acan.