Read Boros Dusun KAJADIAN 43 Bible Online

KAJADIAN 43 - Boros Dusun bible

KAJADIAN 43

¹Paceklik di Kanaan beuki parna.

²Bahan dahareun pamili Yakub beunang bareto meuli ti Mesir geus koredas. Yakub sasauran ka pala putrana, saurna, ”Mareuli deui dahareun ka ditu.”

³Ditembal ku Yuda, ”Ama, kapungkur oge abdi-abdi diancam ku nu kawasa di ditu, teu kenging datang deui upami henteu sareng si bungsu.

⁴Upami si bungsu diwidian mah milu, mangga ka ditu deui oge, meser tedaeun.

⁵Moal, abdi-abdi moal wantun ka ditu upami si bungsu henteu diwidian milu mah, margi saur nu ti ditu: Ulah datang-datang deui mun dulur maraneh nu hiji deui henteu kabawa.”

⁶Saur Yakub, ”Naha atuh bebeja boga keneh dulur sejenna? Nyieun pisusaheun Ama bae!”

⁷Dijarawab, ”Ituna keukeuh naletekeun pamili urang saurna, ’Ari bapa maraneh aya keneh? Maraneh boga deui dulur?’ Kapaksa diwangsul satarabasna, manawi teh moal dugi ka marentah ngabantun pun adi.”

⁸Yuda unjukan deui ka Yakub ramana, ”Titipkeun Binyamin ka abdi, supados tiasa mios ayeuna keneh. Diengke-engke mah bilih urang maraot manten ku langlayeuseun, nya Ama, nya abdi-abdi, nya barudak.

⁹Perkawis Binyamin, ditanggel ku abdi. Abdi sumeja naruhkeun pati, ngabelaan. Upami manehna teu tiasa kabantun deui wangsul kalayan salamet sarta walagri, abdi sing ulah jamuga satutup umur.

¹⁰Cobi upama teu talangke mah, tangtos ayeuna teh parantos baralik deui ti ditu kadua kalina.”

¹¹Waler Yakub, ”Nya ari geus teu beunang diulah-ulah mah dalah dikumaha. Tapi kudu babawaan ti dieu, keur tanda soca, bangsa hasil ieu tanah sarwa saeutik, nu pangalusna: kismis, madu, bungbu-bungbuan, muncang, jeung buah badam.

¹²Duit kudu mawa dua kalieun. Duit nu bareto dipulangkeun kudu dibayarkeun, bisi ti ditu kaliru.

¹³Heug si bungsu bawa, los geura bral.

¹⁴Mugi-mugi ku pitulung Allah Nu Maha Kawasa, eta jelema teh sing aya welasna ka maraneh, kersaeun ngaleupaskeun dulur maraneh anu ayeuna ditahan di ditu, sarta mulangkeun deui Binyamin. Mun kudu nepi ka leungit anak, ari geus teu bisa sumingkir deui mah Ama kari pasrah.”

¹⁵Seug eta sadudulur teh nyadiakeun keur kikintunan jeung duit dua kalieun, geus kitu arindit ka Mesir jeung Binyamin. Sacundukna ka Mesir, terus ngadareuheusan ka Yusup.

¹⁶Ana ningali yen Binyamin oge aya, geuwat Yusup marentah hiji gandek, juru kawasa bumina, saurna, ”Ieu semah kami bawa ka bumi. Meuncit sato hiji, maranehna ku kami rek dibawa tuang engke beurang.”

¹⁷Gandek tumut ka parentah, semah-semah dibawa ka gedong Yusup.

¹⁸Ari maranehna dibawa ka gedong teh bati rarisi. Ceuk pikiran maranehanana, ”Boa dibawa ka gedong teh dilantarankeun ku duit anu bareto dipulangkeun tea. Boa ujug-ujug breg bae diraponan terus dijieun budak beulian, kalde-kalde dirampas.”

¹⁹Nu matak, sanggeus nepi ka lawang gedong, maranehna ngomong ka juru kawasa bumi tea, pokna,

²⁰”Juragan, abdi-abdi teh kapungkur meser tedaeun ti dieu.

²¹Ari dongkap ka lembur, artos pameseranana teh bet aya di lebet karung masing-masing, palih luhur, tur teu aya nu coceng. Ayeuna eta artos teh dibantun.

²²Artos kangge meser deui oge ngabantun. Kapungkur teh duka saha anu ngalebetkeun eta artos kana lebet karung.”

²³Ari jawabna, ”Tong jadi pikir. Teu kudu dipake risi. Anu neundeun eta duit ka jero karung teh tangtu Allah panutan aranjeun, panutan bapa aranjeun, da duit pamayaran tea mah bareto geus katarima.” Geus kitu eta jelema teh ngaleupaskeun Simeon, dipasrahkeun deui ka maranehna.

²⁴Sanggeus araya di gedong Yusup, eta jelema mawakeun cai keur maranehna karukumbah suku, ari maranehna terus maraban kalde.

²⁵Sabot nunggu Yusup sumping palolohor, maranehna nyadiakeun keur tanda soca tea. Geus nyarahoeun yen engke beurang maranehna baris dalahar di dinya.

²⁶Jol Yusup sumping, brek maranehna sarujud, terus nyanggakeun tanda soca.

²⁷Pok Yusup papariksa, ”Kumaha, calageur? Sabaraha taun umurna bapa maneh anu dicaritakeun bareto teh? Kumaha aya keneh, cageur?”

²⁸Wangsulanna, ”Pun bapa, gandek dampal Gusti, aya keneh sareng wilujeng.” Bruk deui maranehna sarujud.

²⁹Ret Yusup ka Binyamin, rayina teges, pok ngalahir, ”Euh ieu, nya, adi bungsu anu dicaritakeun teh? Anaking, sing aya berkah ti Allah.”

³⁰Geus kitu gura-giru ka nu singkur, tina teu kawawa ku ngahelas ningali rayina. Cisocana meh teu kaampeuh, nu matak enggal ka kamar, segruk bae nangis.

³¹Sanggeus ditamas kaluar deui bari mereketkeun anjeun, terus nimbalan sangkan sadia tuangeun.

³²Yusup misah meja, saderekna meja nu hiji deui, urang Mesirna anu bareng milu ngariung, misah deui, kawantu pikeun urang Mesir mah ngahiji dahar jeung urang Ibrani teh hina.

³³Meja Yusup sina paeunteung-eunteung jeung meja saderek-saderekna. Ari dariukna diatur dipanta-panta, ti nu pangkolotna panungtungan di nu pangorana. Diatur nurutkeun panta-panta umurna teh maranehna bati silih teuteup bari harookeun.

³⁴Ari kadaharanana diberean tina meja Yusup. Hancengan keur Binyamin mah mani lima kalieun keur lanceuk-lanceukna. Brak balakecrakan, dalahar nginum jeung Yusup.