Read Boros Dusun KAJADIAN 46 Bible Online

KAJADIAN 46 - Boros Dusun bible

KAJADIAN 46

¹Yakub ngepak barang-barangna, bral angkat ka Bersyeba, terus ngahaturkeun kurban ka Allah, panutan Ishak ramana.

²Peutingna, dina tetenjoan, Allah nimbalan, dawuhana-Na, ”Yakub, Yakub!” Diwaler, ”Nun, ieu abdi.”

³Dawuhana-Na, ”Kami Allah. Allah panutan bapa maneh. Ulah asa-asa rek indit ka Mesir teh. Rundayan maneh ku Kami rek dijieun bangsa gede di ditu.

⁴Maneh ku Kami rek dianteur indit ka Mesir. Ari turunan maneh baris dipulangkeun deui ka dieu. Mun maneh datang ka ajal, baris katungkulan ku Yusup.”

⁵Bersyeba ku Yakub enggeus dikantun. Yakub, putu-putuna, jeung para wanita mantu-mantuna, ku pala putrana sina tarumpak kareta anu dikintun ku raja Mesir.

⁶Ingon-ingon katut sagala harta banda meunang ti Kanaan milu diakut ka Mesir. Kabeh nu jadi rundayan ku Yakub dicandak ngalih, nya eta:

⁷pala putra nu lalaki nu awewe, para putu nu lalaki nu awewe.

⁸Anggota kulawarga Yakub anu arindit ka Mesir jeung anjeunna nya eta Rubin, putrana anu cikal,

⁹jeung putra-putrana: Hanok, Palu, Hesron jeung Karmi.

¹⁰Simeon jeung putra-putrana: Yemuel, Yamin, Ohad, Yakin, Sohar, jeung saurang deui, ngaranna Saul, anak Simeon ti hiji wanita urang Kanaan.

¹¹Lewi jeung putra-putrana: Gerson, Kahat jeung Merari.

¹²Yuda jeung putra-putrana: Selah, Peres jeung Serah. (Putra-putra Yuda sejenna anu lalaki, Er jeung Onan geus maraot di Kanaan.) Putra-putra Peres nya eta Hesron jeung Hamul.

¹³Isaskar jeung putra-putrana: Tola, Pua, Ayub jeung Simron.

¹⁴Sebulun jeung putra-putrana: Sered, Elon jeung Yahlel.

¹⁵Eta putra-putra Yakub ti Lea anu dijurukeun di Mesopotami. Jeung hiji putra istri, Dinah. Jumlah turunan anjeunna ti Lea aya tilu puluh tilu urang.

¹⁶Gad jeung putra-putrana: Sepon, Hagi, Suni, Esbon, Eri, Arod, jeung Areli.

¹⁷Aser jeung putra-putrana: Yimna, Yiswa, Yiswi, Beria, jeung Serah dulur maranehanana anu awewe. Putra-putra Beria nya eta Heber jeung Malkiel.

¹⁸Ieu anu genep belas urang turunan Yakub ti Silpa, asalna emban pamere Laban ka Lea putrana.

¹⁹Putra Yakub ti garwana nu ngaran Rahel, nya eta Yusup jeung Binyamin.

²⁰Di Mesir, Yusup kagungan dua putra pameget ti Asnat geureuhana putra Potifera, imam di kota On, nya eta Menase jeung Epraim.

²¹Putra-putra Binyamin nya eta: Bela, Beker, Asbel, Gera, Naaman, Ehi, Ros, Mupim, Hupim jeung Arda.

²²Ieu anu opat belas urang turunan Yakub ti Rahel.

²³Dan jeung putrana, Husim.

²⁴Naptali jeung putra-putrana: Yahsel, Guni, Yeser jeung Silem.

²⁵Ieu anu tujuhan turunan Yakub ti Bilha, asalna emban pamere Laban ka Rahel putrana.

²⁶Jadi jumlah turunan Yakub anu landes, basa mimiti ngalih ka Mesir teh aya genep puluh genep jiwa, jaba deui bojo-bojo pala putrana.

²⁷Diitung jeung dua putra ti Yusup anu dilahirkeun di Mesir, pamili Yakub teh kabehna tujuh puluh jiwa.

²⁸Yakub ngajurung Yuda ti heula, sina ngawartosan ka Yusup yen anjeunna mundut diantosan di Gosen. Sanggeus aleutan Yakub cunduk ka wates Gosen,

²⁹Yusup angkat kana kareta, rek nepangan ingkang rama. Barang gok patepang, gabrug ngarangkul, pananganana meulit kana tenggek ramana. Gauk nangis lila pisan bari tipepereket nangkeup ka ramana.

³⁰Geus kitu Yakub ngalahir ka Yusup, ”Bagea teuing Enung! Geuning Enung teh hirup keneh. Ayeuna mah Ama teh paeh ge rido, da jeung Enung geus papanggih.”

³¹Ti dinya Yusup ngalahir ka saderek-saderek jeung wargi-wargi ramana, saurna, ”Kuring kudu ngadeuheus unjukan ka raja yen aranjeun jeung Ama sakulawarga geus daratang ti Kanaan, araya di kuring.

³²Rek diterangkeun yen aranjeun tukang ngangon, maliara ingon-ingon, sarta eta pipiaraan kabeh dibawa ka dieu.

³³Upama engke aranjeun ku raja disaur jeung dipariksa pagawean,

³⁴ngajawabna ulah salah yen aranjeun ti bubudak hirup tina miara ingon-ingon sakumaha karuhun. Ku jalan kieu raja tangtu ngidinan aranjeun matuh di Gosen.” Maksud Yusup mamatahan kitu teh lantaran urang Mesir mah kabeh oge henteu raresepeun ka tukang ngangon.