Read Boros Dusun KAJADIAN 7 Bible Online

KAJADIAN 7 - Boros Dusun bible

KAJADIAN 7

¹Ngandika PANGERAN ka Enoh, ”Maneh sakulawarga, geura arasup ka kapal. Ku Kami geus kanyahoan, ngan maneh jelema di ieu dunya anu bener kalakuan.

²Bawa ka kapal saban rupa golongan sato, anu halal masing-masing tujuh jodo, anu haram sajodo-sajodo bae.

³Oge saban rupa golongan manuk masing-masing tujuh jodo. Pek geura pigawe, sangkan eta bangsa sato jeung manuk anu sakitu teh karaksa hirupna, geusan bibit ka hareup.

⁴Tujuh poe deui Kami rek nurunkeun hujan lilana opat puluh poe opat puluh peuting, rek dipake numpes sakur anu kumelip jijieunan Kami.”

⁵Eta sagala timbalan PANGERAN teh ku Enoh dijalankeun.

⁶Dina waktu der caah, yuswa Enoh geus genep ratus taun.

⁷Anjeunna, geureuhana, putra-putrana jeung mantu-mantuna, arunggah ka kapal nyingkahan caah.

⁸Sasatoan, manuk, nu haram, nu halal, masing-masing hiji jalu hiji bikang ti saban golongan,

⁹arasup jeung Enoh ka kapal, sakumaha anu ditimbalkeun ku Allah.

¹⁰Tujuh poe ti harita caah geus mimiti der.

¹¹Nincak kana genep ratus taun yuswa Enoh, dina tanggal tujuh belas, bulan kadua, sungapan-sungapan cai anu rongkah di jero taneuh, kabeh mararudal tingburial, lawang-lawang cai di langit kabeh maruka,

¹²breg hujan turun ka bumi, opat puluh poe opat puluh peuting.

¹³Poe eta keneh Enoh, geureuhana, tilu putrana nya eta Sem, Ham, jeung Yapet, jeung bojo-bojona, arunggah ka kapal.

¹⁴Dibarengan ku sasatoan, sato ingu, sato leuweung, nu gede, nu leutik, manuk, masing-masing ti saban golongan.

¹⁵Ti saban golongan mahluk anu kumelip, masing-masing hiji jalu hiji bikang, arasup jeung Enoh ka kapal,

¹⁶sakumaha anu ditimbalkeun ku Allah. Geus kitu panto kapal teh ditutup ku PANGERAN.

¹⁷Caah lumangsung terus nepi ka opat puluh poe. Cai geus ngaluhuran, geus kuateun ngampulkeun eta kapal nepi ka ngambang.

¹⁸Cai terus beuki luhur, soloyong eta kapal maju.

¹⁹Cai geus kacida luhurna, mani geus laput gunung-gunung anu pangluhurna,

²⁰tapi masih naek keneh bae, nepi ka tujuh meter luhurna ti puncak-puncak gunung.

²¹Sakur mahluk nu kumelip di bumi, manuk, sato, jelema, kabeh tiwas.

²²Tiap mahluk bumi nu boga ambekan, paeh.

²³Tiap mahluk anu kumelip di bumi, manusa, sato, manuk, kabeh ku PANGERAN dibasmi. Anu dikarikeun hirup ngan Enoh jeung anu marilu ka anjeunna ka kapal.

²⁴Cai henteu orot-orot nepi ka saratus lima puluh poe lilana.