Read Boros Dusun KAJADIAN 8 Bible Online

KAJADIAN 8 - Boros Dusun bible

KAJADIAN 8

¹Allah teu lalieun ka Enoh jeung ka sasatoan anu di kapal. Seug Mantenna ngagerakkeun angin niup cai. Cai mimiti rodrodan surud.

²Sungapan-sungapan di jero taneuh, kitu keneh lawang-lawang hujan di langit ngalalingkup deui. Hujan raat,

³cai beuki lila beuki surud di jero saratus lima puluh poe.

⁴Dina tanggal tujuh belas bulan nu katujuh, kapal teh nyangsang di hiji puncak jajaran Gunung Ararat.

⁵Cai surud terus, sarta dina tanggal hiji bulan kasapuluh, puncak-puncak gunung mimiti tarembong.

⁶Opat puluh poe ti harita, Enoh mukakeun jandela,

⁷pur ngaleupaskeun manuk gagak. Gagak teh teu balik deui, terus bae ngalayang kukurilingan nepi ka saatna cai.

⁸Sabot kitu, pur deui Enoh ngaleupaskeun japati, seja naksir cai geus orot atawa acan.

⁹Tapi ku sabab bumi kakeueum keneh, eta japati teu manggih pieunteupeun. Kalayang balik deui ka kapal, ku Enoh ditewak.

¹⁰Anjeunna ngantos deui saminggu, pur japati teh dileupaskeun deui.

¹¹Pasosore eta manuk balik deui, mawa pucuk jetun seger keneh dina pamatukna. Ayeuna Enoh uninga, yen cai geus orot.

¹²Anjeunna ngantos deui saminggu, japati dileupaskeun deui. Teu balik deui ayeuna mah.

¹³Nincak kana 601 taun yuswa Enoh, dina tanggal hiji bulan nu kahiji, cai geus saat. Enoh muka hateup kapal, rarat-reret, katingalieun taneuh geus mimiti tuus.

¹⁴Dina tanggal dua puluh tujuh, bulan anu kadua, bumi geus tuhur pisan.

¹⁵Ngandika Allah ka Enoh,

¹⁶”Geura kaluar ti kapal saanak pamajikan jeung minantu.

¹⁷Kaluarkeun deuih manuk jeung sasatoan sejenna, gede leutik, sina baranahan tuluy malencar ka sakuliah jagat.”

¹⁸Ti dinya Enoh saputra garwa jeung mantu kaluar ti kapal,

¹⁹kitu deui sasatoan jeung manuk, kalaluar papasangan, nurutkeun golonganana.

²⁰Ti dinya Enoh ngadamel altar haturan PANGERAN. Tuluy ngurbankeun sasatoan jeung manuk anu halal, sasiki-sasiki ti tiap golongan, diduruk dina eta altar.

²¹Seungitna eta kurban matak bingah ka PANGERAN, seug Mantenna sasauran lebeting manah, ”Kami hamo nyapa-nyapa deui bumi ku tina kalakuan manusa. Kami nyaho, pipikiranana teh geus kotor ti ngongorana. Moal deui-deui Kami ngabasmi sakabeh mahluk anu nyawaan saperti ayeuna.

²²Sapanjang jagat gumelar, kudu aya usum pepelakan, aya usum panen. Sapapanjangna kudu aya panas, aya tiis, aya usum halodo, aya usum hujan, aya beurang, aya peuting.”