Read Boros Dusun KAJADIAN 9 Bible Online

KAJADIAN 9 - Boros Dusun bible

KAJADIAN 9

¹Allah ngaberkahan ka Enoh jeung putra-putrana. Lahirana-Na, ”Sing laloba anak, sangkan turunan maraneh ngeusian sakuliah jagat.

²Sasatoan, manuk, lauk, bakal mikasieun ka maraneh. Maraneh kawasa ka dinya.

³Ti semet ayeuna, eta ku maraneh bisa didahar cara pepelakan anu harejo. Kop bae pikeun dahareun.

⁴Anu teu meunang didahar ngan sarupa, nya eta daging anu ngandung keneh getih. Kami ngalarang, lantaran dina getih teh aya dat hirup.

⁵Lamun aya anu ngala pati manusa tangtu dihukum. Sato anu maehan manusa, ku Kami baris dihukum paeh.

⁶Manusa teh dijadikeunana sarimbag jeung Kami. Ku sabab eta, sing saha anu maehan manusa, baris dipaehan deui ku sasama manusa.

⁷Maraneh sing laloba anak, sangkan turunan maraneh ngeusian sakuliah jagat.”

⁸Ngandika Allah ka Enoh jeung putra-putrana,

⁹”Kami ayeuna arek nyieun perjangjian ka maneh saturun-tumurun,

¹⁰kitu keneh ka sakabeh mahluk anu nyawaan — manuk jeung sasatoan — sagala rupa bae, anu kalaluar ti kapal reujeung maraneh.

¹¹Kieu ikrar perjangjian Kami ka maraneh: Kami jangji, moal deui-deui sakabeh mahluk anu nyawaan ku Kami dibasmi ku caah; moal aya deui caah gede anu ngaruksak jagat.

¹²Pikeun tanda eta perjangjian Kami anu langgeng ka maraneh jeung ka sakabeh mahluk anu nyawaan,

¹³Kami baris masang katumbiri dina mega. Eta tandana perjangjian Kami ka alam dunya.

¹⁴Samangsa-mangsa Kami ngalaput langit ku mega tuluy timbul katumbiri,

¹⁵eta tanda Kami eling kana jangji ka maraneh jeung ka sasatoan, yen hamo deui caah ngabasmi sakabeh mahluk anu nyawaan.

¹⁶Samangsa-mangsa dina mega tembong katumbiri, tangtu tembong ka Kami, sarta Kami tangtu inget kana jangji Kami anu langgeng, antara Kami jeung sakabeh mahluk anu kumelip di jagat.

¹⁷Kitu tandana perjangjian Kami ka sakabeh mahluk hirup di bumi.”

¹⁸Putra-putra Enoh anu kaluar ti kapal, nya eta: Sem, Ham jeung Yapet. (Ari Ham teh karuhun urang Kanaan.)

¹⁹Ieu putra nu tiluan, jadi karuhun sakabeh manusa sajagat.

²⁰Enoh teh tukang tani. Nya anjeunna jelema anu pangmimitina melak anggur.

²¹Sabada ngaleueut anggur, anjeunna mabok, seug ngalaanan anggoan terus ngagoledag di jero tenda bari purucul.

²²Ari Ham, karuhun urang Kanaan tea, ningali rama purucul kitu teh anggur wawartos ka dua saderekna.

²³Sem jeung Yapet nyandak kampuh, kampuhna dicepeng dikapungkurkeun. Geus kitu lalebet ka jero tenda, angkatna mundur, rup ramana dikampuhan bari mungkur ngalieuskeun raray, sangkan teu ningali kana kaayaan rama anu purucul.

²⁴Barang Enoh geus emut tur uninga kana kalakuan putra nu panganomna kitu ka anjeunna,

²⁵pok ngalahir, ”Si Kanaan sing katulah! Dirina baris jadi badega dulur-dulurna.

²⁶Puji PANGERAN Allahna Sem! Si Kanaan baris jadi badega Sem.

²⁷Mugia Allah nambihan berekah ka Yapet, kalayan ngalegaan panganjrekanana. Mugia turunan Yapet runtut-raut jeung turunan Sem! Si Kanaan baris jadi badega Yapet.”

²⁸Ti sanggeus caah gede tea, Enoh jumeneng keneh 350 taun.

²⁹Pupus dina yuswa 950 taun.