Read Boros Dusun 2 SAMUEL 22 Bible Online

2 SAMUEL 22 - Boros Dusun bible

2 SAMUEL 22

¹Sanggeus Daud luput ti Saul tur rahayu ti sakabeh satru, anjeunna nyanggakeun ieu kidung pupujian ka PANGERAN:

²PANGERAN panyalindungan kaula, benteng kaula anu tohaga.

³Allah teh juru raksa kaula, kaula aman di Mantenna. Lir kepeng, Mantenna mindingan kaula, nangkis bahla, ngamankeun kaula. Mantenna jurusalamet kaula, ngaraksa jeung nyalametkeun kaula tina bahaya.

⁴Kaula ngajerit ka PANGERAN, seug Mantenna ngabebaskeun kaula ti musuh-musuh. Puji PANGERAN!

⁵Ombak pati datang ngalingkung, lambak ajal datang ngagulung.

⁶Bahya maot datang ngepung, kuburan datang naheunan.

⁷Sajeroning kasukeran, kaula nyambat ka PANGERAN, nyambat pitulung Allah. Sora kaula kadangueun ti gedong-Na, panyambat kaula diregepkeun ku Mantenna.

⁸Bumi inggeung jagat endag, dasaring langit aroyag sarehing Allah keur wera!

⁹Haseup meledug tina pangambung-Na, seuneu ngagedag jeung ruhak ruhay nyebrot tina bahan-Na.

¹⁰Mantenna meulahkeun langit, jut lungsur ngadampal mega kandel.

¹¹Biur hiber tunggang mukarabin, sumiriwik nitih jangjang angin.

¹²Mantenna nutupan anjeun ku poek, dikuriling mega kandel pinuh ku cai.

¹³Ruhak ruhay muncrat hurung, mancawura tina kilat payuneuna-Na.

¹⁴Geleger, PANGERAN ngagentra ti angkasa, geleger soara Allah Nu Maha Kawasa.

¹⁵Mantenna mentang-mentangkeun jamparing musuh-musuhna paburisat tingbalecir disalamberan ku kilat.

¹⁶Dasar sagara mani nonggerak, alas jagat jadi ngabuliklak waktu PANGERAN ngahaok ka musuh-musuhna, sarta ngagaur ka maranehna lantaran wera.

¹⁷PANGERAN ti luhur ngahontal ka handap, kaula dirawel terus dibedol ti cai anu jero.

¹⁸Mantenna ngajait kaula ti musuh-musuh anu garagah rosa, jeung ti sakur nu mikangewa anu leuwih kuat batan kaula.

¹⁹Eta teh daratang narajang, sajeroning kaula keur kasusahan. Tapi PANGERAN sumping nulungan.

²⁰Mantenna ngahanjatkeun kaula tina bahla, kaula dirahayukeun, sabab Mantenna nyaaheun.

²¹Kaula ku PANGERAN diganjar, reh lampah kaula bener. Dipaparin rahmat, reh kaula henteu salah.

²²Reh kaula nurut kana papakon PANGERAN, tara baha ka Allah.

²³Reh ngesto kana hukum- hukum-Na, tara ngalawan kana timbalana-Na.

²⁴Mantenna anu uninga, yen lampah kaula beresih, nyegah diri tina lampah salah.

²⁵Ngaganjarna ku sabab lampah kaula bener, reh uninga yen kaula henteu salah.

²⁶Nun PANGERAN, Gusti satuhu ka nu mituhu, satemenna ka nu satemenna.

²⁷Wening galih ka nu hatena beresih, ngamusuh ka nu misatru.

²⁸Ngangkat nu hina harkat, nundukkeun anu arangkuh.

²⁹Nun PANGERAN, Gusti teh sumbering caang, maparin caang ka abdi.

³⁰Abdi sanggup nempuh musuh, ngacak-ngacak kakuatanana. Reh Gusti nu maparin kakuatan, nu maparin kagagahan.

³¹Mantenna Allah, sampurna sugri damel-Na, layak dipercaya pangandika-Na! Keur sakur nu nyalindung ka Mantenna, Allah teh lir jadi kepengna.

³²Ngan PANGERAN anu jumeneng Allah. Ngan Allah panyalindungan urang.

³³Ngan Allah ieu panyalindungan kaula nu teguh, anu ngamankeun jalan kaula.

³⁴Anu ngawatek suku kaula jadi rikat tinanding peucang, di gunung-gunung taya kakeungkang.

³⁵Anu ngajiad kaula parigel perang, sanggup metakeun gondewa nu pangheurasna.

³⁶Nun PANGERAN, Gusti ngauban sareng nyalametkeun abdi, abdi jadi mulya ku pitulung Gusti.

³⁷Gusti ngajagi sangkan abdi ulah katewak, sarta abdi tacan kantos ragrag.

³⁸Sapanjang musuh can tumpur, hantem diudag terus digempur.

³⁹Digeprak teu harudang deui, ngajaloprak di hareupeun abdi.

⁴⁰Dina perang, Gusti nu maparin kakiatan, tur maparin kaunggulan.

⁴¹Ku pitulung Gusti, musuh birat ti abdi, sakur nu ngarah seep dibasmi.

⁴²Musuh nareangan pitulung, tapi taya anu sanggup nulung. Seug sasambat ka PANGERAN, tapi henteu diwaleran.

⁴³Ku abdi diluluh dijieun lebu, dileyek dijieun leutak.

⁴⁴Abdi parantos ditulungan ti sakur nu ngaralawan. Karajaan abdi jadi lega, abdi ngarajaan bangsa-bangsa. Bangsa anu teu wawuh ge jadi bawahan abdi.

⁴⁵Bangsa batur ka abdi sarujud, saucap abdi diturut.

⁴⁶Kalalabur pangacianana, kalaluar ti jero bentengna, awakna pating daregdeg.

⁴⁷PANGERAN jumeneng! Puji panyalindungan kaula! Celukkeun agungna kakuatan Allah anu nyalametkeun kaula!

⁴⁸Mantenna nalukkeun musuh kaula, nundukkeun bangsa-bangsa, jadi bawahan kaula.

⁴⁹Mantenna ngaluputkeun ti anu misatru. Nun PANGERAN, nya Gusti nu ngelehkeun eta musuh-musuh, anu ka abdi ngaraksa, luput ti tukang ngarogahala.

⁵⁰Nu mawi abdi muji ka Gusti di lingkungan bangsa-bangsa. Abdi nganyanyikeun pupujian ka Gusti.

⁵¹Allah maparin kaunggulan langkung-langkung ka raja lisahana-Na! Asih-Na taya petotna, ka raja lisahana-Na, ka Daud sarundayanana, salalanggengna.