Read Boros Dusun 2 SAMUEL 3 Bible Online

2 SAMUEL 3 - Boros Dusun bible

2 SAMUEL 3

¹Saterusna perang antara golongan Saul jeung golongan Daud teh lila pisan. Tapi Daud ngadegna beuki weweg, sabalikna lawanna mah beuki hengker.

²Ieu putra-putra Daud anu dibabarkeun di Hebron, aya genep. Pareleanana nurutkeun tanggal wedalna: Amnon, putra ti Ahinoam urang Yisrel;

³Kilab, putra ti Abigail urut bojo Nabal ti Karmel; Absalom, putra ti Maaka, putri Raja Talmai ti Gesur;

⁴Adonia, putra ti Hagit; Sepaca, putra ti Abital;

⁵jeung Itream, putra ti Egla. Kabeh pameget, dibabarkeunana di Hebron.

⁶Sabot perang antara golongan Daud jeung golongan Saul, Abner beuki kawasa bae di golongan Saul.

⁷Dina hiji poe anjeunna digeunggeureuhkeun ku Isboset putra Saul, lantaran ngaranyed ka Rispa binti Aya, urut parekan Saul.

⁸Abner kasundut manahna, nyarekan ka Isboset, saurna, ”Rek nyangka Bapa hianat ka Saul? Rek nyangka Bapa enyaan ngabantu ka Yuda teh? Malah ku tina ngingetkeun ka Saul suwargina rama hidep, Bapa teh bebela ka saderek-saderekna, ka sobat-sobatna. Hidep pribadi ku Bapa sakitu dibelaanana kapan, henteu diselehkeun ka Daud. Ayeuna, kakara boga kasalahan sakitu jeung eta awewe, nepi ka digeunggeureuhkeun!

⁹Bisi teu uninga, Daud ku PANGERAN geus ditangtukeun bakal nyandak ieu karajaan ti Saul saturunanana. Daud bakal jadi raja Yuda ongkoh, raja Israil ongkoh, raja sakuliah nagara ti tungtung nepi ka tungtung. Ayeuna da enggeus kieu, anggur rek sakalian ngabantu ngalaksanakeun hal eta! Lamun teu nepi ka kitu, kajeun dicabut nyawa ku Allah!”

¹¹Isboset kacida sieuneunana ku Abner, mani teu kecet-kecet.

¹²Ti dinya Abner ngirimkeun jelema ka Daud di Hebron. Titip saurna, ”Nagara teh saha anu bade ngatur? Sae urang ngadamel perjangjian. Jisim abdi sumeja ngabantu nalukkeun Israil ka Sang Raja.”

¹³Waler Daud, ”Satuju! Eta perjangjian urang ayakeun. Saratna: Upama engke anjeun datang nepungan kaula, Mikal binti Saul kudu dibawa.”

¹⁴Kajaba ti kitu Daud ngintunkeun utusan ka Isboset, titip saurna, ”Mikal garwa kami, pulangkeun! Maskawinna, saratus siki kulit kulup urang Pelisti ku kami geus dibayar!”

¹⁵Seug Mikal ku Isboset dicandak ti Paltiel bin Lais salakina.

¹⁶Paltiel nuturkeun nepi ka kota Bahurim bari ceurik sajajalan. Sanggeus diparentah ku Abner, ”Geura balik!” kakara balik.

¹⁷Abner nepungan para pamingpin Israil, tuluy sasauran, ”Ti bareto aranjeun harayang dirajaan ku Daud.

¹⁸Ayeuna tangtu kalakon. Aranjeun tangtu aringet kana timbalan PANGERAN anu kieu, ’Kami arek make abdi Kami Daud ngaluputkeun umat Kami Israil ti urang Pelisti, jeung ti sakabeh musuhna.’ ”

¹⁹Ka urang Binyamin oge Abner nyaurkeun saperti kitu. Ti dinya anjeunna tuluy ka Hebron rek ngunjukkeun ka Daud yen urang Binyamin jeung urang Israil geus daek ngiringan.

²⁰Sasumpingna ka Hebron jeung dua puluh urang pangiringna, Abner ku Daud dipestakeun.

²¹Abner unjukan, ”Jisim abdi amit, bade ihtiar supados sabangsa Israil sumujud ka Gusti. Tangtos hasil, tangtos daraekeun dirajaan ku Gusti. Cita-cita Gusti bakal kahontal, lajeng ngarajaan sakuliah nagara.” Ku Daud dijurung jeung ditanggel kasalametanana.

²²Geus kitu Yoab sabaladna sumping tas ngarurug, nyandak jarahan loba pisan. Ari Abner geus undur ti Hebron, geus dijurung ku Daud tur ditanggel kasalametanana.

²³Sanggeus Yoab sabaladna sumping, aya anu ngabejaan yen Abner tas ngadeuheusan Raja Daud, jeung geus dijurung deui kalawan ditanggel kasalametanana.

²⁴Yoab ngadeuheus ka raja, sarta miunjuk, ”Kumaha tindakan Gusti teh? Abner dongkap ngadeuheus ka Gusti. Ku naon disina wangsul kitu bae?

²⁵Gusti tangtos uninga, ka dieuna aya maksad awon, bade ngintip Gusti damel naon, sok angkat ka mana.”

²⁶Undur ti Daud, Yoab marentah nyusul Abner. Abner kasusul di sumur Sira, tuluy dibawa ka Yoab. Daud teu uningaeun.

²⁷Sanggeus aya di Hebron deui Abner ku Yoab diajak nyalingker ka gigireun panto gapura, pura-pura rek dibawa harewos. Bles beuteungna ditubles ku Yoab, naur pati Asahel rayina.

²⁸Barang Daud ngadangu wartana, anjeunna sasauran nyalira, ”PANGERAN uninga, Abner maotna lain ku kami, lain kahayang raja.

²⁹Babalesna sing malik ka Yoab sakulawarga! Ti unggal turunan Yoab sing aya anu katerap ku kasakit bengang, atawa ku lepra, atawa sing hengker kawas awewe, atawa sing kasambut perang, atawa sing kurang hakan!”

³⁰Kitu jalanna Yoab jeung Abisai ngabales ka Abner anu geus maehan Asahel saderekna basa tarung di Gibon.

³¹Ti dinya Daud marentah sangkan Yoab saanak buahna nyosoeh pakeanana jeung kudu dibaraju karung, nandakeun prihatin ku maotna Abner. Waktu Abner dimakamkeun, Raja Daud ku anjeun ngiring jajap, angkat tukangeun peti mati.

³²Abner dimakamkeun di Hebron. Raja nangis di makam mani ngagukguk, kabeh anu keur di makam careurik.

³³Daud mudalkeun katineungna ka Abner, saurna, ”Na Abner teh maotna kawas nu taya kabisa?

³⁴Pan leungeunna teu ditalian, sukuna teu dibangbaluhan, maotna teh lir jalma anu nyieun kajahatan!” Geus kitu jalma-jalma teh careurik deui nyeungceurikan Abner.

³⁵Sapoe eta Daud henteu kersa tuang, dikeukeuhan ge ku abdi-abdina teu kersaeun bae. Malah saurna, ”Lamun memeh surup panonpoe kami geus barang dahar, masing dicabut nyawa ku Allah!”

³⁶Sanggeus tetela kitu, tungtungna dianggap memang kitu pihadeeunana. Tetela sagala peta anjeunna matak senang ka rahayat.

³⁷Jalma-jalma boh golongan Daud boh golongan Israil jadi yakin, yen maotna Abner lain ku anjeunna.

³⁸Daud ngandika ka para gegeden, ”Bisi teu aruninga, anu hilang poe ieu teh hiji pamingpin Israil anu agung!

³⁹Cacakan kami ku Allah geus dijenengkeun raja, mani ngarasa sakieu leuleusna. Eta anak-anak Seruya teh ceuk kami mah kacida telengesna. Kajahatanana mugia dibales ku PANGERAN.”