Read Boros Dusun 2 RAJA-RAJA 16 Bible Online

2 RAJA-RAJA 16 - Boros Dusun bible

2 RAJA-RAJA 16

¹Ahas putra Yotam mimiti jadi raja Yuda meneran taun katujuh belas Pekah bin Remalya ngarajaan di Israil,

²dina yuswa dua puluh taun. Calikna di Yerusalem, ngarajaanana genep belas taun. Lampahna teu hade, teu cara lampah Raja Daud karuhunna, malah midamel anu henteu kamanah ku PANGERAN Allahna,

³nuturkeun kanircaan raja-raja Israil. Malah meuncit putrana, diduruk disuguhkeun ka arca brahala, lampah anu pikagirukeun cara kalakuan bangsa-bangsa anu ku PANGERAN geus diusiran basa urang Israil mimiti rek arasup ka eta tanah.

⁴Ahas ngurban jeung ngukusna teh di tempat-tempat ibadah ka brahala, di puncak-puncak pasir jeung di handapeun tangkal-tangkal anu ngarunggunuk.

⁵Hiji mangsa Raja Resin ti Siria jeung Raja Pekah ti Israil narajang jeung ngepung Yerusalem, tapi Ahas henteu bisa dielehkeun. (

⁶Sabot kitu kota Elat direbut deui ku raja Edom, urang Yuda di dinya dibuburak. Ti harita saterusna Elat dicaricingan deui ku urang Edom.)

⁷Ti dinya Ahas ngutusan ka Raja Tiglat Pileser di Asur, badaratna, ”Sim kuring sumeja pasrah sadaya-daya ka Sang Raja, seja nyuhunkeun pitulung sarehna keur diperangan ku raja Siria sareng raja Israil.”

⁸Utusanana dibahanan perak jeung emas candak ti Bait Allah jeung ti kamar rajabrana karaton, baktikeuneun ka raja di ditu.

⁹Pamundut Ahas ku Tiglat Pileser ditarima, bral eta raja jengkar nyandak balad ka Damsik. Damsik karebut, Raja Resin tiwas, rahayatna dicandak ka Kir jaradi boyongan.

¹⁰Raja Ahas angkat ka Damsik seja nepangan Raja Tiglat Pileser. Di Damsik anjeunna ningali hiji altar tuluy diconto, contona dikirimkeun ka Imam Uria.

¹¹Seug Uria nyieun altar ceples sakumaha contona. Memeh Ahas sumping geus anggeus.

¹²Sasumpingna ti Damsik tur altar geus anggeus,

¹³Ahas tuluy peupeuncitan terus diduruk dina eta altar jeung kurban kadaharan, altarna dikucuran ku getih sato kurban jeung ku cianggur.

¹⁴Ku sabab altar tambaga paranti ngurban ka PANGERAN ayana teh di antara altar anyar anu anjeunna jeung Bait Allah, eta altar ku Ahas dipindahkeun ka beulah kalereun altar anyar anu anjeunna.

¹⁵Geus kitu anjeunna nimbalan ka Uria, ”Kurban beuleuman isuk, kurban kadaharan sore, sakabeh kurban beuleuman jeung kurban kadaharan sore, sakabeh kurban beuleuman jeung kurban kadaharan ti raja jeung jalma rea, kitu deui sakabeh kurban inuman ti jalma rea, kudu dikurbankeunana dina ieu altar kami anu gede. Sato-sato kurban getihna kucurkeun kana eta. Ari altar tambaga mah ngan pikeun kaperluan kami bae, pikeun menta pituduh ti para arwah.”

¹⁶Sakumaha timbalan raja ku Uria dilampahkeun.

¹⁷Jeung deui Raja Ahas ngakatan bagian papadatian tambaga paragi Bait Allah tea, paso-pasona diangkat. Tatalagaanana ge diangkat tina dua belas sasapian tambaga anu mungguna, diteundeun dina dadampar batu.

¹⁸Jeung pikeun nyenangkeun panggalih raja Asur, hateup anu ngauban singgasana raja di jero Bait Allah ku Ahas dikakat, sarta lawang anu ngawungkul pikeun raja lebet ka Bait Allah ku anjeunna dibongkar.

¹⁹Carita Raja Ahas salian ti eta aya dina Kitab Babad Raja-raja Yuda.

²⁰Ahas pupus, dikurebkeun di makam karajaan di Kota Daud, tuluy diganti ku Hiskia putrana.