Read Boros Dusun 1 BABAD 26 Bible Online

1 BABAD 26 - Boros Dusun bible

1 BABAD 26

¹Urang Lewi tukang jaraga Bait Allah, ti golongan Korah: Meselemya bin Kore, kaasup turunan Asap.

²Putrana tujuh: Kahiji Jakaria, kadua Yediael, katilu Sebaja, kaopat Yatniel,

³kalima Elam, kagenep Yohanan, katujuh Elyunai.

⁴Obed Edom, ku Allah dikurniaan dalapan putra: Kahiji Semaya, kadua Yosabad, katilu Yoah, kaopat Sakar, kalima Netanel,

⁵kagenep Amiel, katujuh Isaskar, kadalapan Pehuletai.

⁶Semaya putra Obed Edom anu cikal putrana genep: Otni, Repael, Obed, Elsabad, Elihu jeung Semakya, jalma-jalma penting di kalangan golonganana, gede kamampuhna. Anu bakatna pangnyongcolangna Elihu jeung Semakya.

⁸Ti kulawarga Obed Edom dilengkepan ku genep puluh dua urang, jelema-jelema anu kacida carakepna pikeun ieu pagawean.

⁹Ti kulawarga Meselemya dilengkepan ku dalapan belas urang, jelema-jelema anu carakep.

¹⁰Ti kulawarga Merari nya eta Hosa, anu anakna opat lalaki, nya eta: Simri (lain cikal, tapi ku ramana dijadikeun pamingpin),

¹¹Hilkia, Tebalya jeung Jakaria. Ti kulawarga Hosa anu jaradi pangawal Bait Allah teh kabehna tilu belas urang.

¹²Tukang jaraga Bait Allah teh dijieun sababaraha rombongan nurutkeun bilangan kulawarga, kawajibanana nyabak pagawean di Bait Allah ongkoh cara urang Lewi umumna.

¹³Saban kulawarga, boh anu bilanganana loba, boh anu saeutik, narik elot pikeun nganyahokeun kudu ngajaga lawang anu mana.

¹⁴Selemya kabagian lawang wetan. Jakaria, putrana anu hade nasehat, kabagian lawang kaler.

¹⁵Obed Edom kabagian lawang kidul, ari putra-putrana kabagian ngajaga gudang-gudang.

¹⁶Supim jeung Hosa kabagian lawang kulon jeung Gapura Saleket di lebah tanjakan. Giliran jagana diatur patuturut.

¹⁷Anu jaga di beulah wetan sapoena genepan, anu di beulah kaler opatan, anu di beulah kidul opatan. Ari gudang-gudang barang, eta oge anu ngajagana opatan, hiji gudang dijaga ku duaan.

¹⁸Anu jaga deukeut papiliun beulah kulon sisi jalan opatan, di papiliunna duaan.

¹⁹Eta bagian jagaan-jagaan golongan Korah jeung golongan Merari.

²⁰Urang Lewi lianna ngajaga rajabrana Bait Allah jeung gudang-gudang barang hadiah anu geus dibaktikeun ka Allah.

²¹Ladan, salah saurang anak Gerson, ngarundaykeun sababaraha rombongan kulawarga, kaasup oge kulawarga Yehiel, anakna.

²²Anak Ladan anu dua deui, nya eta Setam jeung Yoél, dibere kawajiban ngajaga rajabrana Bait Allah jeung gudang-gudang barang.

²³Turunan Amram, Yishar, Hebron jeung Usiel, eta oge aya kawajibanana.

²⁴Anu jadi kapala nu ngajaraga rajabrana Bait Allah nya eta Sebuel ti golongan Gersom bin Musa,

²⁵wargi keneh ka Selomit rerehan ti Elieser saderek Gersom, jujutanana: Elieser puputra Rehabya, Rehabya puputra Yesia, Yesia puputra Yoram, Yoram puputra Sikri, Sikri puputra Selomit.

²⁶Selomit sakulawarga kabagian ngajaga barang-barang hadiah anu ku Raja Daud, ku kapala-kapala kulawarga, ku para pamingpin rombongan warga-warga jeung ku para panglima geus dibaktikeun ka Allah,

²⁷nya eta sabagian tina barang jarahan perang, anu disucikeun pikeun digunakeun di jero Bait Allah.

²⁸Selomit sakulawarga kudu ngajaga sagala rupa barang anu geus disucikeun pikeun pakeeun di Bait Allah, kitu deui barang-barang pangbakti ti Nabi Samuel, ti Raja Saul, ti Abner bin Ner jeung ti Yoab bin Seruya.

²⁹Urang Lewi ti turunan Yishar, Kenanya sapala putra kapapancenan ngurus catetan-catetan jeung nguruskeun sual panyerewedan antara urang Israil.

³⁰Ti turunan Hebron, Hasabya katut sanak barayana sarebu tujuh ratus urang jalma-jalma anu aya kasebutna, kapapancenan nguruskeun sual-sual kaagamaan jeung urusan pamarentahan di Israil anu di kuloneun Walungan Yordan.

³¹Jalma-jalma turunan Hebron dipingpinna ku Yeria. Waktu diayakeun pamariksaan dina taun kaopat puluh Daud jumeneng raja, kanyahoan yen di kulawarga-kulawarga turunan Hebron loba prajurit anu garagah, caricingna di Yaser, wewengkon Gilad.

³²Ti sanak baraya Yeria, Daud nyandak dua rebu tujuh ratus jelema penting kapala-kapala kulawarga, disina ngurus sual-sual kaagamaan jeung urusan pamarentahan di Israil wetaneun Walungan Yordan, nya eta di wewengkon-wewengkon Rubin, Gad jeung Menase Wetan.