Read Boros Dusun 2 BABAD 31 Bible Online

2 BABAD 31 - Boros Dusun bible

2 BABAD 31

¹Sabada pesta wekasan, sakumna bangsa Israil ngadatangan kota-kota Yuda, ngancur-ngancurkeun tugu-tugu brahala, nyacar arca-arca Asera, ngaburak-barik tempat-tempat ngabakti ka brahala jeung altar-altarna. Kabeh dieuweuhkeun ti sakuliah Yuda, kitu deui ti wewengkon-wewengkon Binyamin, Epraim, jeung Menase. Geus kitu kakara maranehna baralik ka tempatna masing-masing.

²Para imam jeung urang Lewi ku Raja Hiskia diatur deui, dijieun rombongan-rombongan. Tiap rombongan boga papancen anu baku keur rombonganana, kayaning: metakeun kurban beuleuman, kurban karapihan, ngabantu ngalaksanakeun kumpulan ibadah di Bait Allah, nyanggakeun pupujian jeung pangucap sukur di ditu di dieu di Bait Allah.

³Raja Hiskia nyayagikeun sato-sato kurban tina kagunganana ku anjeun, pikeun kurban beuleuman isuk jeung sore, pikeun kurban unggal poe Sabat, unggal poe Pesta Bulan Anyar, jeung pikeun kaperluan poe-poe suci salian ti eta anu dimistikeun ku Hukum PANGERAN.

⁴Jeung deui timbalan raja, urang Yerusalem kudu marere derma ka para imam jeung urang Lewi, sangkan maranehna jongjon jeung suhud ngajaralankeun papancen-papancen anu dimistikeun dina Hukum PANGERAN.

⁵Meunang parentah kitu urang Israil gancang narurut. Para imam jeung urang Lewi pada marawakeun, gandum panghadena, cianggur, minyak jetun, madu jeung hasil bumi lianna, jaba marawakeun perpuluhan tina sagala kabogana.

⁶Jalma-jalma anu caricing di kota-kota Yuda, kabeh marere perpuluhan tina sapina jeung dombana, jaba derma-derma lianna kacida lobana, beunang misahkeun ti anu dibaktikeun ka PANGERAN Allahna.

⁷Dina bulan anu katilu, sumbangan-sumbangan mimiti merul, kitu bae saterusna nepi ka opat bulan, datang ka ngunung-ngunung.

⁸Raja Hiskia jeung para ponggawa ngarucap sukur ka PANGERAN, reh ningali barang-barang sumbangan sakitu lobana, sarta maruji ka urang Israil.

⁹Raja cacarios ka para imam jeung urang Lewi perkara eta sumbangan.

¹⁰Asarya, Imam Agung, turunan Sadok, unjukan kieu ka anjeunna, ”Ti wangkid jalmi-jalmi ngawitan ngabarantun sumbangan ka Bait Allah, tedaeun abdi sadaya kalintang cekapna, tur sakitu seueurna keneh. Eta sadaya hibar berkahing PANGERAN ka umat-Na.”

¹¹Ku timbalan raja maranehna nyieun gudang-gudang di lingkungan Bait Allah;

¹²barang-barang sumbangan jeung perpuluhan teh disimpen di dinya supaya aman. Tuluy ku raja jeung Imam Agung Asarya dicangkingkeun ka hiji urang Lewi ngaran Konanya, dibantu ku adina anu ngaran Simei,

¹³ngabawah sapuluh urang deui urang Lewi nya eta: Yehiel, Asasia, Nahat, Asahel, Yerimot, Yosabad, Eliel, Yismakya, Mahat jeung Benaya. Nohonan satimbalan raja jeung Imam Agung Asarya, eta sakabehna ku maranehna dilaksanakeun.

¹⁴Kore bin Yimna, urang Lewi kapala jaga lawang Bait Allah di Gapura Wetan, dikawasakeun narimaan barang-barang pangbakti ka PANGERAN jeung ngabagi-bagikeunana.

¹⁵Di kota-kota sejen tempat pamukiman para imam, manehna boga pangbantu-pangbantu anu saratia, urang Lewi keneh, nya eta: Eden, Minyamin, Yesua, Semaya, Amarya jeung Sekanya, purah ngabagikeun bahan dahareun kalawan walatra ka papada urang Lewi, nurutkeun kumaha papancenna,

¹⁶lain nurutkeun golongan-golonganana. Sakabeh lalaki anu umur tilu puluh taun ka luhur, anu kagiliran tugas saban poe di Bait Allah, eta oge dibarerena bagian teh masing-masing ku karana papancenna.

¹⁷Para imam diaturna nurutkeun golonganana, ari urang Lewi anu umurna dua puluh taun ka luhur diaturna nurutkeun rombonganana.

¹⁸Eta mah didaptarna jeung saanak bojona katut sakur anu jadi tanggunganana, lantaran kudu sayaga saban waktu pikeun ngajalankeun tugas-tugas suci.

¹⁹Di unggal kota jeung sampalanana anu diajangkeun keur turunan Harun, aya imam-imam anu dikawasakeun ngabagikeun bahan dahareun ka sakabeh kulawarga imam anu lalaki jeung ka sakur anu asup kana daptar golongan-golongan Lewi.

²⁰Di sakuliah Yuda, Raja Hiskia midamel anu sapagodos jeung manah PANGERAN Allahna.

²¹Sagala ihtiarna pikeun kapentingan Bait Allah jeung pikeun ngalaksanakeun papakon PANGERAN, dijalankeunana kalawan manah anu suhud, satia, ta’at ka anu jadi Allahna, nu matak sagala damelna lulus.