Read Boros Dusun NEHEMIA 11 Bible Online

NEHEMIA 11 - Boros Dusun bible

NEHEMIA 11

¹Nu nyaricingan Yerusalem teh nya eta para kapala. Nu salianna mah dilotre heula, hiji kulawarga ti tiap sapuluh kulawarga, pikeun nangtukeun saha anu kudu cicing di Yerusalem, kota suci. Sasesana, caricingna di kota-kota jeung di desa-desa lianna.

²Anu suka rela menta cicing di Yerusalem, mani pada maruji ku sarerea.

³Urang Israil, para imam, urang Lewi, kuli-kuli Bait Allah, jeung turunan abdi-abdina Suleman anu marukimna di kota-kota jeung desa-desa lianna, caricingna teh di tanah milikna masing-masing, satempatna-satempatna. Kapala-kapala warga kota ti propinsi Yuda anu caricing di Yerusalem, ieu daptarna.

⁴Anggota kaom Yuda: Ataya bin Usia incu Jakaria. Karuhun-karuhun anu sejenna nya eta Amarya, Sepaca, jeung Mahalalel turunan Peres bin Yuda.

⁵Maaseya bin Baruk incu Kolhose. Karuhun-karuhunna anu sejenna nya eta Hasaya, Adaya, Yoyarib, jeung Jakaria, turunan Sela bin Yuda.

⁶Ti turunan Peres, anu caricing di Yerusalem aya 468 urang, jelema-jelema penting.

⁷Anggota kaom Binyamin: Salu bin Mesulam incu Yoed. Karuhun-karuhunna anu sejen nya eta Pedaya, Kolaya, Maaseya, Itiel, jeung Yesaya.

⁸Gabai jeung Salai, baraya deukeutna Salu. Urang Binyamin anu caricingna di Yerusalem kabehna 928 urang,

⁹dikapalaan ku Yoel bin Sikri, jeung Yuda bin Hasenua, anu jadi wakil kawasa kota.

¹⁰Para imam: Yedaya bin Yoyarib, jeung Yakin.

¹¹Seraya bin Hilkia incu Mesulam. Karuhun-karuhunna anu sejen nya eta Sadok, Merayot, jeung Ahitub, anu jadi Imam Agung.

¹²Ti ieu warga kabehna 822 urang, kabeh baroga tugas di Bait Allah. Adaya bin Yerobam incu Pelalya. Karuhun-karuhunna kaasup Amsi, Jakaria, Pashur, jeung Malkia.

¹³Ti ieu warga kabehna aya 242 urang, kabeh kapala-kapala kulawarga. Amasai bin Asarel incu Ahsai. Karuhun-karuhunna kaasup oge Mesilemot, jeung Imer.

¹⁴Ti ieu warga kabehna 128 urang, kabeh jaradi perjurit petingan, dikapalaan ku Sabdiel, hiji anggota kulawarga anu penting.

¹⁵Urang Lewi: Semaya bin Hasub incu Asrikam. Karuhun-karuhunna kaasup oge Hasabya jeung Buni.

¹⁶Sabetai jeung Yosabad, urang Lewi anu penting, tugasna ngawaskeun pagawean di luareun Bait Allah.

¹⁷Matanya bin Mika incu Sabdi, turunan Asap. Jadi pamingpin jurukawih Bait Allah pikeun mirig doa sukur. Bakbukya, anu ngabantu Matanya. Abda bin Samua incu Galal, turunan Yedutun.

¹⁸Urang Lewi anu caricing di kota suci Yerusalem kabehna 284 urang.

¹⁹Pangawal-pangawal Bait Allah: Akub, Talmon jeung sakulawargana, 172 urang.

²⁰Urang Israil sasesana, para imam lianna jeung urang Lewi, caricingna di kota-kota jeung desa-desa lianna di Yuda, di tanah milikna masing-masing.

²¹Kuli-kuli Bait Allah caricingna di Opel, hiji tempat di Yerusalem, pangawasna Siha jeung Gispa.

²²Pangawas urang Lewi anu caricing di Yerusalem nya eta Usi bin Bani incu Hasabya. Karuhun-karuhunna kaasup oge Matanya jeung Mika. Kaasup warga Asap, warga tukang musik dina upacara-upacara di Bait Allah.

²³Ngeunaan ieu golongan geus aya aturan karajaan hal giliranana mingpin musik di Bait Allah unggal-unggal poe.

²⁴Petahya bin Mesesabel ti golongan Sera jeung kaom Yuda, ngawakilan bangsa Israil di Gedong Pangadilan Nagri Persia.

²⁵Rahayat loba anu maratuhna di desa-desa deukeut tanah pertanianana. Kaom Yuda di Kiryat Arba, Dibon jeung Yekabsel jeung di kampung-kampung anu dareukeut ka dinya.

²⁶Aya oge anu caricing di kota Yesua, kota Moladah, kota Bet Pelet,

²⁷jeung kota Hasarsual, jeung di Bersyeba sarta desa-desa di sakurilingeunana.

²⁸Di kota Siklag, di kota Mekona jeung di desa-desana,

²⁹di kota Enrimon, di kota Sora, di kota Yarmut,

³⁰di kota Sanoa, di kota Adulam, jeung di desa-desa anu dareukeut ka dinya. Maranehna maratuhna di Lakis jeung di lahan-lahan deukeut eta, jeung di Aseka katut di desa-desana. Tegesna, urang Yuda teh maratuhna di wewengkon antara Bersyeba di beulah kidul jeung Lebak Hinom di beulah kaler.

³¹Urang kaom Binyamin maratuhna di Geba, Mikmas, Ai, Betel jeung di desa-desa anu dareukeut ka dinya.

³²Di Anatot, Nob, Ananya,

³³Hasor, Ramah, Gitaim,

³⁴Hadid, Seboim, Nebalat,

³⁵Lod jeung Ono, jeung di Lebak Patukangan.

³⁶Sawatara rombongan urang Lewi anu tadina maratuh di daerah Yuda, dititah maratuhna ngahiji jeung urang Binyamin.