Read Boros Dusun BUDALAN 1 Bible Online

BUDALAN 1 - Boros Dusun bible

BUDALAN 1

¹Yakub ngungsina ka Mesir teh sapala putra, masing-masing jeung saanak bojona. Putra-putrana nya eta:

²Rubin, Simeon, Lewi, Yuda,

³Isaskar, Sebulun, Binyamin,

⁴Dan, Naptali, Gad, jeung Aser.

⁵Jumlahna aya tujuh puluh urang turunan Yakub. Ari putrana nu jenengan Yusup mah geus ti heula aya di Mesir.

⁶Yusup pupus, saderek-saderekna parupus, kitu deui jalma-jalma anu saentragan jeung Yusup.

⁷Kari turunan-turunanana, nya eta urang Israil. Ieu bangsa laloba anakna, jumlahna beuki ngarekahan sarta jadi kuat, Mesir geus pinuh ku maranehna.

⁸Geus kitu ngadeg hiji raja anyar nyangking Mesir, anu henteu uningaeun ka Yusup.

⁹Eta raja nimbalan ka rahayatna, saurna, ”Urang Israil kacida lobana jeung kuat. Urang jadi kaancam.

¹⁰Mun aya perang palangsiang maranehna biluk ka musuh merangan ka urang tuluy kalabur ti dieu. Ayeuna urang akalan supaya ulah ngalobaan.”

¹¹Seug urang Israil teh ku urang Mesir ditarik, dipaksa kana gawe beurat, nu dipalar supaya paeheun pikir. Urang Israil dipaksa gawe nyieun kota pagudangan pikeun raja, nya eta kota Pitom jeung Raamses.

¹²Tapi beuki dikaniaya kalah ka beuki loba, sumebar di sakuliah nagara, kacida dipikainggisna ku urang Mesir.

¹³Atuh beuki dikaniaya, kacida diteungteuinganana, sina nyarieunan bata jeung rupa-rupa pagawean di tegalan-tegalan, teu pisan diomberan.

¹⁵Malah raja Mesir marentah ka Sipra jeung Pua, dua paraji anu sok marajian ka awewe urang Ibrani, timbalanana,

¹⁶”Lamun marajian awewe urang Ibrani, orokna lamun lalaki paehan, mun awewe meunang dihirupan.”

¹⁷Tapi eta dua paraji teh mikasieun ka Allah, parentah rajana henteu diturut. Teu aya orok lalaki anu dipaehan.

¹⁸Ku raja disalaur jeung dipariksa, ”Ari maraneh kumaha? Ku naon orok-orok lalaki diantep bae sina harirup?”

¹⁹Piunjuk paraji, ”Awewe urang Ibrani teu sapertos awewe Mesir. Awakna kariat, ngajuruna garampil, memeh paraji dongkap orokna parantos brol manten.”

²⁰Nu matak eta dua paraji teh mareunang kurnia ti Allah, nepi ka barisa imah-imah kurenan. Ari urang Israil terus bae ngalobaan, beuki kuat.

²²Tungtungna raja Mesir marentah ka sakabeh rahayatna, timbalanana, ”Rampas sakabeh orok lalaki urang Ibrani, palid-palidkeun ka Walungan Nil. Nu awewe ingkeun, hirupan.”