Read Boros Dusun BUDALAN 25 Bible Online

BUDALAN 25 - Boros Dusun bible

BUDALAN 25

¹PANGERAN nimbalan ka Musa,

²”Bejakeun ka urang Israil, kudu marere pangbakti ka Kami. Tarimaan barang-barangna ku maneh, naon bae anu diridokeun ku maranehna,

³nya eta: emas, perak, tambaga;

⁴lenen lemes; wol biru, wol wungu, wol beureum; baju tina bulu embe;

⁵kulit domba jalu celepan beureum, kulit lemes; kayu pilang;

⁶minyak lampu; wawangian pikeun minyak pangistrenan jeung pikeun seuseungitan anu arum;

⁷batu angkik jeung batu permata lianna pikeun naretes epod jeung oto Panghulu Agung.

⁸Jeung kudu nyieun hiji kemah suci pikeun Kami, sabab Kami rek linggih reureujeungan jeung maranehna.

⁹Jieun, lengkep jeung paparabotanana anu engke ku Kami ditembongkeun contona ka maneh.”

¹⁰”Jeung sina nyieun hiji peti tina kayu pilang, panjangna 110 sentimeter, rubakna 66 sentimeter, luhurna 66 sentimeter.

¹¹Luar jerona kudu disaput ku emas murni, sisi sakurilingna kudu dielis ku emas keneh.

¹²Dina opat sukuna kudu diberean geugeulangan emas sabeulahna dua-dua.

¹³Jeung kudu nyieun rancatanana tina kayu pilang disaput emas,

¹⁴corokkeun kana geugeulangan eta peti, sabeulahna hiji rancatan.

¹⁵Rancatanana kudu diantep nyorok kana geugeulanganana ulah dicabut-cabut.

¹⁶Dua papan batu ti Kami anu ditulisan papakon-papakon tea asupkeun kana eta peti.

¹⁷Jieun tutupna, panjangna 110 sentimeter, rubakna 66 sentimeter.

¹⁸Tuluy nyieun mumukarabinan dua siki tina emas ketokan,

¹⁹pasangkeun dina tutupna, sabeulahna hiji-hiji. Masangkeunana kudu dihijikeun kana tutup peti tea.

²⁰Eta mumukarabinan kudu pahareup-hareup, beungeutna masing-masing tungkulkeun kana tutup peti, jangjangna sina meber ngauban petina.

²¹Dua papan batu tea teundeun di jero eta peti, tutupna terapkeun ti beulah luhur peti.

²²Nya di dinya Kami baris patepung jeung maneh, ngandikakeun papakon-papakon Kami pikeun urang Israil ti luhureun turub pangrapih nya eta tutup peti tea, antara dua mumukarabinan.”

²³”Jeung kudu nyieun hiji meja tina kayu pilang, panjangna 88 sentimeter, rubakna 44 sentimeter, jangkungna 66 sentimeter.

²⁴Kudu dilapis ku emas murni, sisi sakurilingna kudu dielisan ku emas.

²⁵Titimbirna sakuriling rubakna 75 milimeter, sisina kudu dielis ku emas.

²⁶Dina opat sukuna unggal juru kudu diberean geulang emas hiji-hiji paranti ngagotong eta meja.

²⁷Geulang-geulang paranti nyorokkeun rancatan lamun eta meja rek digotong, diterapkeunana kudu deukeut kana titimbir mejana.

²⁸Rancatanana oge kudu ku kayu pilang dilapis emas.

²⁹Tuluy nyieun piringna, cangkirna, kendina, jeung pingganna paranti ngahaturanan cianggur. Kabeh kudu tina emas tulen.

³⁰Eta meja diteundeunna kudu di hareupeun Peti Perjangjian, sarta salawasna kudu dieusi ku roti anu geus disucikeun pikeun Kami.”

³¹”Kudu nyieun suku palita tina emas tulen. Tihang jeung dadamparna kudu emas ketokan. Berean papaes anu direkakeun kembang-kembang, lengkep katut kuncup jeung daun kembangna, hijikeun kana tihangna.

³²Tihangna kudu cabang genep, sabeulahna tilu-tilu.

³³Unggal cabang kudu dihias ku tilu papaes anu direkakeun kembang kanari, lengkep katut kuncup jeung daun kembangna.

³⁴Tihangna oge kudu dihias ku opat papaes anu direkakeun kembang kanari, lengkep katut kuncup jeung daun kembangna.

³⁵Handapeun unggal cabang kenca katuhu, masing-masing kudu diheuleutan ku papaes anu direkakeun kembang sapentol.

³⁶Pentol-pentol kembangna, cabang-cabangna, kitu deui tihang lampuna dijieunna kudu tina emas ketokan tulen sarta asal tina sagebleg.

³⁷Kudu nyieun palitana tujuh siki, pasang dina cabang-cabangna, seungeut, caangna ka hareupkeun.

³⁸Kudu nyieun cacapitna jeung tatadahna tina emas tulen.

³⁹Emas pikeun nyieun eta suku palita katut papaesna emas tulen, beuratna kudu tilu puluh lima kilo.

⁴⁰Sing ati-ati, nyieunna kudu cocog teu meunang mencog tina conto anu ku Kami diterangkeun di gunung.”