Read Boros Dusun BUDALAN 26 Bible Online

BUDALAN 26 - Boros Dusun bible

BUDALAN 26

¹”Ari Kemah Suci, Kemah Tepangan Kami, ti jerona kudu make reregan sapuluh gebar tina lenen lemes anu digintir tina wol biru, wungu, jeung beureum. Rereganana kudu make sulaman-sulaman anu direkakeun mukarabin.

²Gebaranana kabeh saukuran, panjangna 12 meter, rubakna 2 meter.

³Anu lima gebar sambung-sambungkeun, jait sagebarkeun, pon kitu anu lima gebar deui.

⁴Kudu nyieun kakantet-kakantet tina lawon biru, terapkeun kana tungtung-tungtung luar tiap gebaran.

⁵Gebaran kahiji kakantetna lima puluh, nerapkeunana sing meneran kana lima puluh kakantet dina gebaran kadua.

⁶Dikantetkeunana kudu make kakantet tina emas, lobana lima puluh siki.

⁷Kemah pongpok kaler ti luhurna kudu dikeput ku lawon tina bulu embe, sawelas gebar,

⁸masing-masing ukuranana kudu sarua, panjangna 13 meter, rubakna 2 meter.

⁹Anu lima gebar sambung-sambung, jait sagebarkeun, pon kitu anu genep gebar deui. Gebar anu kagenep tilep dua di lebah Kemah bagian hareup.

¹⁰Tungtung lambaran anu hiji dina sisina kudu diberean lima puluh kakantet, kitu keneh lambaran sejenna dina tungtung sisina kudu diberean lima puluh kakantet.

¹¹Kudu nyieun lima puluh kakait tambaga, tuluy terapkeun kana kakantet-kakantet tea pikeun nyambungkeun supaya anu dua lambar teh jadi disalambarkeun.

¹²Reregan anu sapotong deui gantungkeun dina tukangeun Kemah.

¹³Leuleuwihna dina dua tungtung ka panjangna anu masing-masing 50 sentimeter, gantungkeun dina gigir Kemah dua beulahanana sina nutupan.

¹⁴Kudu nyieun dua deui pikeun tutup pangluarna, hiji tina kulit domba jalu beunang ngabeureuman, hiji deui tina kulit anu lemes.

¹⁵Pikeun Kemahna kudu nyieun papan-papan kayu pilang, sing lalempeng,

¹⁶anu ukuranana masing-masing panjangna opat meter, rubakna 66 sentimeter,

¹⁷sarta kudu make dua pupurus supaya bisa diranjing-ranjingkeun. Kabeh papan kudu dipupurusan.

¹⁸Papan pikeun sisi kidul lobana dua puluh,

¹⁹make dadampar opat puluh siki tina perak, sapapanna dua-dua pikeun nahan pupurusna.

²⁰Pikeun sisi kaler dua puluh papan,

²¹dadampar perakna opat puluh, sapapanna dua-dua.

²²Pikeun sisi tukang beulah kulon genep papan.

²³Dina tiap juruna dua-dua papan.

²⁴Ieu papan-papan pojok dipasangna di handap kudu pasambung terus nepi ka luhur. Papan anu dua lambar anu ngawangun dua popojok, dijieunna kudu kitu.

²⁵Jadi kudu aya dalapan lambar papan, katut genep belas dadampar perakna, unggal papan dua-dua.

²⁶Kudu nyieun pikeun papalangna lima welas siki tina kayu pilang, lima keur papalang papan-papan Kemah sisi anu sabeulah,

²⁷lima keur papalang papan-papan sisi anu sabeulah deui, lima deui keur papalang papan-papan tukang beulah kulon.

²⁸Papalang panengah cicingna kudu satengah tangtung papan jeung kudu kebat ti tungtung nepi ka tungtung.

²⁹Papan-papanna kudu dilapis ku emas, jeung kudu diberean geulang-geulang tina emas keur imah papalang. Papalang-papalangna oge kudu dilapis ku emas.

³⁰Jieun eta Kemah sing cocog jeung anu ku Kami ditataan ka maneh di gunung.

³¹Rereganana nyieun hiji deui, lenen anu ditinun jeung benang wol warna biru, wungu, jeung beureum, sarta kudu dihias ku sulaman anu direkakeun mukarabin.

³²Eta reregan gantungkeun dina opat tihang kayu pilang lapis emas anu dadamparna perak, cocogkeun jeung kakait-kakaitna.

³³Dipernahkeunana handapeun jajaran cacantel anu dina lalangit Kemah, kait-kaitkeun rereganana kana eta. Peti Perjangjian anu dieusi dua papan batu tea, teundeun di tukangeun eta reregan. Gunana eta reregan pikeun wates anu misahkeun Kamar Suci ti Kamar Pangsucina.

³⁴Tutup pangrapihna pasang dina luhur Peti Perjangjianana.

³⁵Ari meja tea diteundeunna kudu di luareun Kamar Pangsucina, nyanghareup ka sisi kaler, ari suku palita diteundeunna nyanghareup ka sisi kidul.

³⁶Lawang asup ka jero Kemah kudu ditetebengan ku reregan tina lenen lemes anu ditinun jeung benang wol warna biru, wungu, jeung beureum, dihias ku sulaman.

³⁷Rereganana kudu make lima tihang tina kai pilang anu dilapis ku emas. Tatapakan tihang-tihangna kudu ku tambaga.”