Read Boros Dusun BUDALAN 31 Bible Online

BUDALAN 31 - Boros Dusun bible

BUDALAN 31

¹PANGERAN nimbalan ka Musa,

²”Kami geus milih hiji jelema ti kaom Yuda, ngaranna Besalel bin Uri, incu Hur,

³dieusian pangawasa Kami, dibere pangarti, kaahlian, jeung pangabisa kana juan-jieun rupa-rupa barang seni,

⁴mahir ngareka-reka jeung migawe barang-barang karajinan tina emas, perak, jeung tambaga;

⁵mahir meulah inten, ngukir kayu, kitu deui sarupaning barang-barang seni.

⁶Pikeun batur digawena ku Kami geus dipangmilihkeun Oholiab bin Ahisamak ti kaom Dan. Malah jalma-jalma ahli karajinan anu sejen oge ku Kami geus dibere pangabisa anu punjul, sina nyarieun naon bae sakur anu ku Kami diparentahkeun kudu dijieun, nya eta:

⁷Kemah Tepangan Kami, Peti Perjangjian katut tutup pangrapihna, barang-barang perhiasan Kemah,

⁸meja sapuratina, suku palita sapuratina tina emas murni, altar pangukusan,

⁹altar kurban beuleuman sapuratina, jolang katut dadamparna,

¹⁰pakean agung imam pikeun Harun jeung anak-anakna parantina ngimaman,

¹¹minyak pangistrenan, jeung seuseungitan anu arum pikeun di Kamar Suci. Dijieunna ku maranehna teh kabeh kudu cocog sakumaha anu ku Kami geus diandikakeun ka maneh tea.”

¹²PANGERAN nimbalan ka Musa

¹³supaya misaur ka urang Israil, ”Maraneh kudu ngagumatikeun poe Sabat, poe reureuh Kami, karana eta poe teh jadi tanda di antara Kami jeung maraneh turun-tumurun, anu nandakeun yen maraneh geus dipilih dijieun umat Kami.

¹⁴Ieu poe reureuh teh suci, ku maraneh kudu disucikeun. Saha-saha anu henteu ngestokeun, saha-saha anu barang gawe dina poe eta, kudu dipaehan.

¹⁵Pikeun maraneh barang gawe teh genep poe. Poe nu katujuh poe reureuh anu hidmat anu kudu dibaktikeun ka Kami. Saha bae, anu barang gawe dina poe eta kudu dipaehan.

¹⁶Poe Sabat ku urang Israil kudu digumatikeun, karana eta teh tanda tina perjangjian tea,

¹⁷tanda anu tetep antara urang Israil jeung Kami. Karana Kami, PANGERAN ngajadikeun langit jeung bumi di jero genep poe, ari dina poe nu katujuh Kami reureuh, liren tina sagala damel.”

¹⁸Sanggeus ngadawuh ka Musa di Gunung Sinai, Allah ka Musa maparinkeun dua papan batu tea, anu dieusi ku papakon-papakon kenging nyeratkeun Allah ku manten.