Read Boros Dusun BUDALAN 37 Bible Online

BUDALAN 37 - Boros Dusun bible

BUDALAN 37

¹Besalel nyieun Peti Perjangjian tina kayu pilang, panjangna 110 sentimeter, rubakna 66 sentimeter, jangkungna 66 sentimeter.

²Luar jerona dilapis ku emas, sarta sakurilingna diwengkuan ku emas.

³Opat sukuna kenca katuhu make geugeulangan emas paranti ngagotong, sabeulahna dua-dua.

⁴Tuluy nyieun rancatanana tina kayu pilang disaput emas,

⁵seug dicorokkeun kana geugeulanganana kenca katuhu.

⁶Ti dinya nyieun tutupna tina emas tulen, panjangna 110 sentimeter, rubakna 66 sentimeter.

⁷Geus kitu nyieun dua mukarabin tina emas ketokan,

⁸dipasang dihijikeun kana tutup peti tungtung pada tungtung,

⁹disina pahareup-hareup tarungkul kana tutup peti, jangjangna maleber mayungan.

¹⁰Geus kitu Besalel nyieun meja tina kayu pilang, panjangna 88 sentimeter, rubakna 44 sentimeter, jangkungna 66 sentimeter,

¹¹saluluarna dilapis ku emas, sisi-sisina dielis ku emas,

¹²sarta sakurilingna make titimbir rubakna 75 milimeter, terus diwengku ku emas.

¹³Dina opat popojok lebah sukuna make geugeulangan emas paranti ngagotong.

¹⁴Eta geugeulangan paranti nyorokkeun rancatan supaya mejana bisa digotong, diterapkeunana deukeut kana garis sisi.

¹⁵Tuluy nyieun rancatanana tina kayu pilang dilapis ku emas.

¹⁶Paparabotan pikeun eta meja kabeh tina emas: piring, cangkir, kendi, jeung bokor-bokor paranti ngahaturkeun cianggur.

¹⁷Geus kitu Besalel nyieun suku palita tina emas tulen. Dadampar jeung tihangna tina emas ketokan. Papaesna direkakeun kembang-kembang, lengkep katut kuncup jeung daun kembangna, ngahiji kana badanna.

¹⁸Cabangna kenca katuhu aya genep, sabeulahna tilu-tilu.

¹⁹Unggal cabang genepanana make tilu papaes direkakeun kembang kanari, lengkep katut kuncup jeung daun kembangna.

²⁰Tihangna make opat papaes anu direkakeun kembang kanari, lengkep katut kuncup jeung daun kembangna.

²¹Handapeun unggal cabang kenca katuhu, masing-masing diheuleutan ku papaes anu direkakeun kembang sapentol.

²²Pentol-pentol kembangna, cabang-cabangna, jeung tihangna, kabeh emas ketokan anu ngajadi sahiji bagian.

²³Sanggeus kitu tuluy nyieun palitana tujuh pasangkeuneun dina eta suku palita. Ti dinya nyieun cacapitna jeung tatadahna tina emas tulen.

²⁴Emas tulen anu dipake nyieun eta suku palita lengkep jeung parabotna, beuratna 35 kilo.

²⁵Geus kitu Besalel nyieun altar tina kayu pilang pikeun pangukusan. Ukuranana pasagi, panjangna 45 sentimeter, rubakna 45 sentimeter, jangkungna 90 sentimeter, tatandukanana dihijikeun ka dinya di opat juruna.

²⁶Beungeutna, badanna sakurilingna jeung tatandukanana disaput ku emas, biwirna sakurilingna diwengku ku emas.

²⁷Tuluy diceulian kenca katuhu handapeun wengkuna paranti ngagotong, dicorok ku rancatan.

²⁸Rancatanana tina kayu pilang dilapis ku emas.

²⁹Geus kitu Besalel nyieun minyak suci paranti ngistrenan, kitu deui seuseungitan anu arum anu tulen dicampur cara buatan tukang wawangian.