Read Boros Dusun BUDALAN 39 Bible Online

BUDALAN 39 - Boros Dusun bible

BUDALAN 39

¹Ari pakean agreng pikeun imam-imam keur pakeeun ari babakti di Kamar Suci, bahanna wol biru, wungu, jeung beureum. Prak we tukang-tukang teh nyieun pakean imam pikeun Harun, nurutkeun sakumaha timbalan PANGERAN ka Musa.

²Nyieun epodna tina lenen lemes, wol biru, wungu, jeung beureum, jeung benang emas.

³Sarta eta tukang-tukang teh ngetok emas sina meber tuluy diguntingan aripis, diterap-terapkeun kana kaen lenen lemes jeung kana wol warna biru, wungu, jeung beureum tea.

⁴Geus kitu nyieun tali taktakna dua, dijaitkeun kana tungtung-tungtung epod ti luhur kenca katuhu supaya eta oto bisa dipageuhan.

⁵Tuluy nyieun tali beubeurna tina bahan anu eta keneh, dijaitkeun kana epodna sina ngahiji, sakumaha timbalan PANGERAN ka Musa tea.

⁶Ti dinya nyadiakeun batu-batu permata dalima tuluy dicangkokan ku emas disusunkeun, sarta batuna diukiran ku dua welas ngaran putra-putra Yakub, kacida alusna,

⁷seug diterapkeun dina tali taktak epod kenca katuhu, ngalambangkeun dua welas kaom Israil, sakumaha timbalan PANGERAN ka Musa.

⁸Ari otona bahanna sarua jeung bahan epod, sulamanana oge sarua.

⁹Bangunna pasagi jeung dirangkep. Panjangna 22 sentimeter, rubakna oge sakitu.

¹⁰Eta oto ditaretes ku batu-batu permata opat jajar. Permata jajaran kahiji: mirah dalima, manikem koneng jeung batu dalima.

¹¹Permata jajaran kadua: jambrut, nilem jeung inten.

¹²Permata jajaran katilu: pirus, angkik jeung kucubung.

¹³Permata jajaran kaopat: ratna-campaka, permata dalima, jeung widuri pandan. Permatana kabeh dicangkok ku emas.

¹⁴Unggal batu permatana diukiran ku ngaran pala putra Yakub, ngalambangkeun dua welas kaom Israil.

¹⁵Otona make dua rantay emas murni anu dirarakeun siga tali,

¹⁶dua cangkok emas, jeung dua ali emas. Ali emasna dijaitkeun dina tungtung oto beulah luhur kenca katuhu,

¹⁷sarta rantay emas tea dicantelkeun kana eta dua ali.

¹⁸Ari tungtung rantay nu sabeulah deui duanana dicantelkeun kana dua cangkok emas anu ayana dina tali taktak epod beulah hareup kenca katuhu.

¹⁹Nyieun deui dua ali emas, dijaitkeun dina tungtung-tungtung oto beulah handap dina sisina beulah jero luareun epod.

²⁰Nyieun deui dua ali emas, tuluy dijaitkeun kana puhu tali taktak epod beulah hareup deukeut kelinna, luhureun tali beubeur epod kenca katuhu.

²¹Sakumaha timbalan PANGERAN ka Musa, ali-ali oto jeung ali-ali epod dirempetkeun tuluy dibeungkeut ku pita biru, supaya otona bener cicingna di luhureun tali beubeur jeung supaya henteu lesot.

²²Ari baju kurung anu baris dipake luareun epod bahanna kabeh wol biru.

²³Pinggiran beuheungna sakurilingna dikelin ku lawon tinun supaya henteu soeh.

²⁴Tungtung handap nu ngarumbay sakurilingna dirarawisan ku dadalimaan tina lenen lemes jeung wol biru, wungu, beureum, dipaselangkeun jeung genta-genta laleutik tina emas tulen, sakumaha timbalan PANGERAN ka Musa.

²⁷Jeung nyieun kameja pikeun Harun jeung putra-putrana pameget,

²⁸dastar, kerepus, calana pondok tina lenen lemes;

²⁹nyieun solempang tina lenen lemes jeung tina wol warna biru, wungu jeung beureum, dimamanis ku sulaman, sakumaha timbalan PANGERAN ka Musa.

³⁰Jeung nyieun perhiasan jamang suci tina emas murni, diukiran kalimah ”Suci bade ka PANGERAN”.

³¹Eta perhiasan digantelkeun kana dastar beulah ti hareup ku tali warna biru, sakumaha timbalan PANGERAN ka Musa.

³²Sagala rupa pagawean anu tumali jeung Kemah Tepangan PANGERAN geus anggeus kabeh. Ku urang Israil dijieunna kabeh cocog jeung timbalan PANGERAN ka Musa.

³³Geus kitu Kemah teh disanggakeun ka Musa jeung sakabeh paparabotanana: kakait-kakait, papan-papan, papalang-papalang, tihang-tihang katut tatapakan-tatapakanana;

³⁴tutup tina kulit domba beunang ngabeureuman, tutup tina kulit lemes; reregan aling-aling;

³⁵Peti Perjangjian anu dieusi dua papan batu, rancatanana, tutupna;

³⁶meja jeung sakabeh paparabotanana katut roti haturkeuneun ka Allah;

³⁷suku palita tina emas tulen, palita-palitana, sakabeh paparabotanana katut jeung minyak lampuna;

³⁸altar emas; minyak pangistrenan; seuseungitan anu arum; reregan lawang Kemah;

³⁹altar tambaga katut panggarangan tambagana; rancatanana jeung sakabeh paparabotanana; jolang paranti kukumbah jeung dadamparna;

⁴⁰reregan-reregan palataran, tihang-tihang katut tatapakan-tatapakanana; reregan lawang palataran jeung tambang-tambangna, pancuh-pancuh Kemah, sakabeh paparabotan pakeeun di jero Kemah;

⁴¹pakean agreng imam paranti babakti di Kamar Suci, nya eta pakean suci pikeun Imam Harun sapala putra.

⁴²Eta kabeh dijieunna ku urang Israil teh cocog jeung pangandika PANGERAN ka Musa.

⁴³Seug eta barang-barang teh ku Musa dipariksaan hiji-hiji. Sanggeus kauninga yen kabeh cocog sakumaha pamundut PANGERAN, seug sakabehna ku Musa diberkahan.