Read Boros Dusun AYUB 11 Bible Online

AYUB 11 - Boros Dusun bible

AYUB 11

¹”Moal diwalonan eta obrolan Ayub teh? Seja dihaminan bae catur anu sakitu panjangna teh?

³Ayub, dikira eta kasauran teh mo aya nu bisa ngabantah? Dikira nu lian baris kapeupeuh mun anjeun baceo?

⁴Anjeun ngarasa bener sorangan, ngarasa beresih di payuneun Allah.

⁵Teuing ku hayang, Allah ku manten kersa ngawaler ka anjeun!

⁶Muga-muga ka anjeun nerangkeun, yen kapinteran teh rupa-rupa, tur rea anu teu katepi ku uteuk manusa, ku jero-jerona. Mun dibanding jeung gedena dosa anjeun, eta hukuman ti Mantenna teh teu sabaraha.

⁷Na sanggup anjeun neuleuman wawatesan kaagungan jeung kakawasaan Allah?

⁸Dalah langit nu ku urang teu kahontal, ku Allah mah katepi kasungsi. Mantenna awas ka alam kubur, urang mah henteu.

⁹Kaagunganana ngungkulan legana jagat, ngungkulan legana samudra.

¹⁰Upama anjeun ku Mantenna didakwa sarta didoja, saha anu bisa ngahalang-halang?

¹¹Allah mah teges, mana jalma anu taya harga, awas kana sagala lampah jahatna.

¹²Jalma bodo kakara bisa mimiti pinter, engke lamun kalde jarah geus lindeuk ti barang borojol.

¹³Sing pasrah ka Allah, masing muntang ka Mantenna.

¹⁴Kadorakaan, kaluluputan, jauhkeun ti rumah tangga,

¹⁵sangkan teuneung sarta tanggah ngalawan paneka dunya.

¹⁶Lamun kitu sagala kasusah baris ngiles tina ingetan. Mun caah mah geus eureun, mo kainget-inget deui.

¹⁷Nya hirup kari mencrangna, leuwih ti batan srangenge wanci manceran, nu tadina poek mongkleng, baris ngagebray lir cahya pajar.

¹⁸Moal teu ngarasa aman turta pinuh ku harepan, ku Allah baris diraksa, dipaparin katengtreman.

¹⁹Teu kudu rempan sieun aya musuh, malah loba nu baris marenta tulung.

²⁰Sabalikna nu jarahat bati culang-cileung jeung tagiwur, teu maranggih panglumpatan, nasibna kari sarupa, nya tiwas jadina.”