Read Boros Dusun AYUB 14 Bible Online

AYUB 14 - Boros Dusun bible

AYUB 14

¹Ti barang lahir manusa teh lemah teu aya daya, pondok umurna seueur kasusahna,

²enggal alum enggal murag cara kembang, les musna cara kalangkang.

³Kersa Gusti mandang saeutik mah ka abdi, ya Allah? Atanapi abdi teh bade dijogokeun ka pangadilan?

⁴Manusa mah mo tiasa ngabijilkeun sipat suci kawantos sipat kaayaanana najis.

⁵Jumlah umurna, jumlah bulanna ku Gusti parantos dipatok ti samemehna ti sateuacanna parantos dipasti hamo bisa robah deui.

⁶Tong ditingalikeun bae, mending antep sina nyorangan, sina ngararasakeun genah tina hirupna anu pinuh ku kacape.

⁷Leuheung tangkal, dituar ge henteu lapur-lapur teuing, da osok sirungan deui,

⁸najan akarna ngolotan, tunggulna paeh kaurugan taneuh,

⁹ana kasaba ku cai mah pelentung kaluar sirung, semu hurip kawas pepetetan anyar.

¹⁰Ari jalmi ana maot tuluy buntu, hirupna duka ka mana tuluyna.

¹¹Jeg walungan saat ngoletrak, eureun ngocorna, kawas talaga surud caina, tuluy garing,

¹²kitu keneh jalma ana geus paeh moal hirup deui, nepi ka leungitna langit ge moal hudang-hudang, moal lilir-lilir pikeun saterusna.

¹³Anggursi abdi sumputkeun, di ditu di alam nu paraeh, masing buni, ngantos bendu Gusti sirna, nepi ka cunduk waktuna abdi dipiemut deui.

¹⁴Na tiasa jalmi nu parantos maot hirup deui? Abdi mung hayang enggal leupas tina ieu kalaraan, hayang rada senang ulah kawas ayeuna.

¹⁵Supados samangsa-mangsa digentraan bisa enggal ngawangsul, tangtos ieu mahluk kagungan teh ku Gusti baris kamanah.

¹⁶Najan saincak-incak angger diawaskeun bae, nanging tangtos moal ditaliti deui salahna,

¹⁷da parantos dihampura, dilubarkeun tina dosa, sugri kaluluputan parantos dipupus.

¹⁸Sakumaha gunung-gunung lalongsor urug, cadas-cadas ngalaleser,

¹⁹batu-batu lalegok kacurugan ku cai taneuh palid ku hujan gede. Nya kitu pisan Gusti oge ngabasmi pangharepan hirup manusa.

²⁰Manusa geus eleh ku Gusti, lajeng diusir salalamina beungeutna diparieuskeun kana pati

²¹najan anakna marulya, manehna teu terang-terang, atanapi lamun anakna dihihina, manehna teu mendak beja,

²²wungkul ngarasakeun kanyeri anu keur nyiksa ragana, bari hatena banget nalangsa.”