Read Boros Dusun AYUB 19 Bible Online

AYUB 19 - Boros Dusun bible

AYUB 19

¹”Aeh-aeh, moal eureun-eureun nganyenyeri ka kuring teh?

³Bet hayoh bae nyarekan mani laklak dasar, euweuh kaera!

⁴Barina ge mun enya tea mah kuring teh salah, cik naon ngarugikeunana ka anjeun?

⁵Make ngarasa leuwih bener batan kuring, mani pok deui, pok deui, majar pang kuring lara kieu teh cingcirining gede dosa.

⁶Na teu kaerong yen ieu teh dihaja ku Gusti Allah, geusan mancing-mancing kasalahan kuring?

⁷Mantenna enggeus kaniaya ka kuring, kuring malik teu suka. Tapi omongan kuring euweuh nu nganggap. Menta kaadilan kitu keneh euweuh nu nolih.

⁸Sagala tarekah taya nu laju, dihalang-halang bae ku Allah, sina poekkeun teu bisa mikir, nepi ka teu bisa deui ihtiar.

⁹Harta banda ku Mantenna dirampas, harkat reujeung darajat digejretkeun,

¹⁰harepan-harepan dirabut, kuringna digaley diteundeut-teundeut, lur diantep gering nangtung, sina paeh.

¹¹Na aya bendu pohara teuing, mani kacida gemeseuna-Na, kuring dianggap musuh gerot-Na,

¹²mun nu perang tea mah Mantenna mani ngirimkeun balad, pasanggrahan kuring dikepung, ditingker sakurilingna.

¹³Dulur-dulur sina naringgalkeun, nu warawuh geus arembungeun deui wawuh,

¹⁴sanak baraya jeung sobat-sobat teu nyaho ka marana.

¹⁵Nu bareto osok larbek ngararanjang geus teu aringet-inget deui. Ku lanjang-lanjang purah babantu nepi ka dianggap si manyang-munyung.

¹⁶Nyalukan badega teu nembalan-nembalan acan, dipentaan tulung ambleng.

¹⁷Pamajikan nepi ka mengek irung, baueun ku ambekan kuring. Dulur-dulur pet ku hinis arembungeun deukeut-deukeut acan.

¹⁸Barudak ari nenjo kuring teh tingcirihil ngeak-ngeak.

¹⁹Sobat medok narenjona bangun rek arongkek, malah jalma-jalma anu pangdipikanyaahna ge tega nonggongan.

²⁰Kulit mani tingulawir, siga geus kari nyangsang kana tulang. Cindekna kuring teh teu samar deui tereh paturay jeung hirup.

²¹Ku Allah diteundeut-teundeutkeun nepi ka gepeng. Anu matak cik, da aranjeun mah sobat, sing baroga rasrasan!

²²Bet kalah ka pipilueun ka Allah nyiksa kuring, nganyenyeri teh teu seubeuh-seubeuh.

²³Hayang teh ieu omongan kuring aya nu nyatetkeun, tiap kecapna ditulis dijieun buku.

²⁴Atawa ditatah dina batu, diukir di dinya, ngarah awet saumur-umur henteu kapupus.

²⁵Ayeuna mah keun bae, da engke ahirna mah tangtu aya nu baris ngabelaan kuring teh, ti sawarga.

²⁶Najan kulit beak ruksak ku panyakit, sapanjang boga keneh awak mah kuring mo weleh tumeuteup ka Allah.

²⁷baris katenjo ku panon pribadi, tur ku Mantenna ge moal diapilainkeun deui. Ngadenge omongan ti aranjeun, hate nepi ka ngalenyap. Da ceuk aranjeun,

²⁸ʼKumaha akalna sangkan manehna nyerieun hate?ʼ Seug aranjeun nyarieun ekol keur nyeklek-nyeklekkeun.

²⁹Tapi ati-ati, sing sayaga nadah pedang-pedang ti Allah, nu baris ngabudalkeun bebendu-Na, ka nu geus nyarieun dosa. Engke kakara ku aranjeun kanyahoan, yen aya Hakimna nu baris ngahukum.”