Read Boros Dusun AYUB 22 Bible Online

AYUB 22 - Boros Dusun bible

AYUB 22

¹”Na aya jelema, najan anu pangpinterna, anu baris mangpaʼat ka Gusti Allah?

³Upama anjeun bener ge tur hade gawe, keur Mantenna mah naon piuntungeunana, moal matak ngabantu.

⁴Mana ku Mantenna dilara-lara, diterapan cocoba oge lain ku sabab anjeun ibadah,

⁵tapi ku sabab geus loba teuing dosa, geus kacida dorakana.

⁶Ka dulur ge tega ngarampas gadeanana, nepi ka ngarangsadan, nepi ka dulur teu boga keur salin-salin acan.

⁷Ka nu mopo tara mere nginum-nginum acan, ka nu kalaparan bororaah mere dahar.

⁸Kalah ka ngarampas tanah, dicokot salegana, ngagunakeun kakawasaan jeung kalungguhan.

⁹Ka nu geus raranda cadu ngabantu, ka nu yatim tega ngarampog, tur neungteuinganan.

¹⁰Atuh pantes ayeuna anjeun dironom bahla, ngadak-ngadak loba kasieun,

¹¹poe jadi poek medem nepi ka anjeun teu bisa nenjo, sarta kalimpudan caah.

¹²Allah teh jumeneng-Na di nu pangunculna, di manggung, ka bentang-bentang anu sakitu luhurna ge ningali-Na teh bari tungkul.

¹³Kari-kari ceuk anjeun, ʼUninga naon Gusti Allah, da Mantenna mah di ditu, kahalangan ku angkeub, mo iasa naon-naon.ʼ

¹⁴Anjeun ngira, Mantenna moal ningalieun waktu keur angkat dina pelengkung langit, lantaran kahalangan ku mega.

¹⁵Bet kitu pipikiran anjeun mah, dipake nuturkeun jalan nu disorang ku nu jarahat.

¹⁶Mungguh nu karitu tea, memeh tepi ka mangsa ge geus palid manten ku caah.

¹⁷Moal teu karitu jelema-jelema nu nolak Allah mah, nu teu percaya yen Mantenna kawasa ka manusa.

¹⁸Padahal barisana mukti teh ku saha lamun lain ku Gusti Allah. Kuring mah teu ngarti kana pipikiran jelema jahat teh.

¹⁹Nu matak pantes, mun aya nu jahat meunang wawales teh. Jelema-jelema anu balener jeung teu baroga salah mah kacida aratoheunana.

²⁰Moal henteu, nu jarahat mah sagala pangabogana baris dibasmi, sesana dihuru nepi ka taya nu kari.

²¹Anu matak, ayeuna mah sing nurut ka Allah, sing sadrah, ulah ngamusuhan kitu, sangkan ginanjar berkah-Na.

²²Turut piwulang-Na, imankeun timbalana-Na, teundeun dina ati sanubari.

²³Kudu handap asor rendah hate, tobat ka Allah, eureunan sagala dosa jeung kadorakaan. Sing beresih rumah tangga teh tina sagala masiat.

²⁴Emas-emasan piceunan, nu pangalusna ge tong lebar alung-alungkeun ka leuwi.

²⁵Nu jadi emas perak urang, leuwih mulya batan eta, tur taya wates wangenna, nya Allah Nu Maha Kawasa.

²⁶Lamun kitu, batin anjeun moal weleh ngait ka Allah, da karasa Mantenna teh sumber kabagjaan anjeun.

²⁷Mun sasambat ku Mantenna tangtu diwaler, sarta anjeun baris nekanan panadaran.

²⁸Sagala usaha baris ngajadi, jalan hirup ngabulungbung, caang sagala-galana.

²⁹Jalma anu rendah hate, tangtu diraksa ku Allah, sabalikna ari adigung mah baris digejretkeun.

³⁰Lamun hirup anjeun lempeng sarta satemenna, sarta bener dina sagala tingkah laku, tangtu ku Mantenna dirahayukeun.”