Read Boros Dusun AYUB 24 Bible Online

AYUB 24 - Boros Dusun bible

AYUB 24

¹Ku naon Allah teu ngayakeun waktu keur ngahakiman, hiji poe kaadilan keur sakur nu ngawula ka Mantenna?

²Jalma-jalma nyorok wates lahan batur, ngarah lahanna tambah lega, malingan domba dicampurkeun jeung anuna.

³Ka kalde-kalde para pahatu teu dikarikeun, kitu keneh sapi milik para randa nu teu bisa mayar hutang.

⁴Hak-hakna kaum miskin ditararahan, nu kokoro dibuburak.

⁵Atuh nu mariskin teh lir kalde alas, nareangan dahareun ka leuweung nu kagaringan di mana-mana geus teu manggih dahareun keur anak-anakna.

⁶Jadi kapaksa kudu ngala ti lahan lain bogana ngumpulkeun anggur nu aya di kebon-kebon jalma jarahat tea.

⁷Ari peuting hareesna di nu ngaliglag, tingporongkol teu dibaju, teu disimbut,

⁸lamun hujan di pagunungan, mani kuyumus, marucicid tingsalindung tukangeun batu.

⁹Barudak anu geus teu baroga bapa, dibadegakeun, disina kerja paksa, nu teu bisa mayar hutang, anakna dirampas,

¹⁰nu balangsak diurak, tur teu baju-baju acan. Batur panen, kaum miskin mah ngongkrong.

¹¹Rajeun ge digarawekeun, upamana meres minyak jeung anggur geusan inumeun, tetep bae tikorona mah gararing.

¹²Di lembur patingharegung, nu taratu nu sakarat, tapi kawas henteu didangu ku Allah.

¹³Aya deuih, jalma-jalma nu ngamusuh ka nu caang-caang, di nu caang teh kalah ka samar polah, nu matak caang teh disalingkiran.

¹⁴Nu arek ngarogahala, arek maehan si miskin, inditna teh poek keneh memeh caang. Nu ngarampog, biasana peuting-peuting.

¹⁵Nu rek lacur, inditna bada sareupna, bari palungas-palengos sieun kawawuhan.

¹⁶Nu ngabangsat, nu ngagangsir, salawasna sok ti peuting, ti beurang mah ngadedempes nyumputan caang.

¹⁷Jadi ku nu karitu mah caang teh dipikasieun. Sabalikna, ka nu poek-poek mah resep, da pangrasana aman taya bahaya.”

¹⁸”Jalma jahat bakal katarajang caah, lahan bogana disapa ku Allah moal bisaeun deui manehna melakan kebon anggurna.

¹⁹Lir salju musna ku panas jeung katiga nya kitu jelema nu boga dosa musna ti dunya enggon nu hirup.

²⁰Ku indungna sorangan ge geus teu dipikainget, jasadna geus dihakanan ku bilatung geus binasa lir tangkal anu geus rubuh.

²¹Kitu bagian si euweuh rasrasan. Si tukang ngisat randa-randa, si tara nyaah ka nu garabug.

²²Allah teh maha digjaya. Lamun Mantenna geus meta, si kumawasa dibinasa, si jahat dicabut nyawa.

²³Najan disabaran bae oge, tur diantep sina rareugreug naranjung, tetep ku Allah diincer.

²⁴Sanggeus diingkeun sakeudeung, sanggeus hasil panejana, kulapes layu ngadadak, lir daun anu ngararas, lempes lir ranggeuyan pare dipetik tina gagangna.

²⁵Pek, saha nu bisa ngabantah, nu rek nyebut lain kitu? Bisa ngabuktikeun, lamun eta henteu bener?”