Read Boros Dusun AYUB 28 Bible Online

AYUB 28 - Boros Dusun bible

AYUB 28

¹Aya tempat pangalian perak, aya tempat paranti ngabesot emas.

²Beusi dikali ti jero bumi, babatuan dilebur diala tambagana.

³Tempat poek pangpoekna ku manusa dipariksa, jajantung bumi dikotektak ditaliti, cadas-cadas di nu ngajumbleng ditalugaran.

⁴Jauh ti tempat mahluk kumelip, di nu can kungsi pisan katincak, manusa nyieun guha pangalian, digarawe di dinya mencilkeun maneh, guwang-gawing dina tambang, dina sumur pangalian.

⁵Bumi di luar ngabijilkeun bangsa dahareun, di jerona dikorowek burak-barik.

⁶Babatuanana aya batu nilemna, keusikna aya anu ngandung emas.

⁷Jajalaneun dina eta pangalian, dalah ku heulang tara kalanglang, ku gagak tara kateang,

⁸malah maung atawa sato galak nu lianna, taya hiji anu lumanto ka dinya.

⁹Cadas sakumaha teuasna ditugar, gunung-gunung dikali didungkar,

¹⁰ditembus ku torowongan, breh kapanggih babatuan anu marulya.

¹¹Sirah-sirah walungan oge dikali, eusi nu asalna buni diangkat ka anu negla.

¹²Tapi cik, di mana ayana ari sumber kapinteran? Ka mana kudu nyukcrukna sangkan kaulik?

¹³Kapinteran mo kapanggih ti manusa, mo kaulik aci-acining pangajina.

¹⁴Ceuk dasar sagara, eta mah euweuh di kami, ceuk dasar lautan, eta mah taya di kami.

¹⁵Hamo kabeuli ku emas perak,

¹⁶hamo kabayar ku emas kolot reujeung permata,

¹⁷najan emas golondongan atawa emas perhiasan, kitu deui kaca batu pangalusna, mo bisa dipake nukeuran.

¹⁸Kapinteran leuwih mahal batan mutiara, ti batan kristal atawa mirah dalima,

¹⁹teu kaimbang ku ratna campaka, teu kaudag ku emas pangkolotna.

²⁰Di mana sumberna ari kapinteran? Ka mana kudu nyukcrukna sangkan kaulik?

²¹Gaib, kaalingan tina panon sugri nu kumelip, dalah ku manuk tukang haliber teu bisa tembong.

²²Jungkrang pati jeung maot ge, kana kapinteran ukur ngadenge bejana.

²³Ngan Allah nyalira nu ngahartos kana jalanna, nu uninga kana tempatna.

²⁴Kawantu Mantenna mah awas ka saampar jagat, tingali ka sakolong langit.

²⁵Mangsa Mantenna mere tanaga ka angin, bari matok legana lautan,

²⁶mangsa nangtoskeun iraha mangsana hujan, bari nangtoskeun pijalaneun kilat guludug,

²⁷eta kapinteran teh ku Mantenna ditilik, seug diuji kamampuhanana, ti dinya disahkeun jeung dipetakeun.

²⁸Pok Mantenna ngadawuh ka manusa, ”Hayang pinter kudu ajrih ka PANGERAN, hayang boga pangarti, sing jauh ti kagorengan.”