Read Boros Dusun AYUB 29 Bible Online

AYUB 29 - Boros Dusun bible

AYUB 29

¹Ayub sasauran deui,

²”Kahayang mah hirup teh cara bihara-bihari, waktu eukeur diraksa keneh ku Allah,

³basa ku Mantenna tara kendat disarengan, nepi ka kuring tara poekeun, caang ku cahya Mantenna.

⁴Harita mah kuring teh jelema mukti, kawantu dalit jeung Allah, rumah tangga ditangtayungan.

⁵Jeung Allah Nu Maha Kawasa teu pisah-pisah, jeung anak riung mungpulung.

⁶Tara towong nginum susu, loba sapi loba embe, di kebon di tanah cadas tangkal jetun tingarulang.

⁷Ana sesepuh kota gempungan, kuring ge milu nungkulan.

⁸Lamun lar kuring ngaliwat, nu ngarora nyararisi mere jalan, nu sarepuh ararajeg ngahalormat.

⁹Lamun kuring enggeus datang, pamingpin-pamingpin nu keur cacarios ge liren heula nyariosna,

¹⁰dalah jalma pangpentingna ari datang kuring mah jep jempe.

¹¹Ku nu nyaraho sorangan atawa ku nu sakadar ngadenge, salampah-lampah kuring dipuji, jadi senen kalemekan.

¹²Lamun aya nu miskin ngalengis, gancang ku kuring ditulung. Nu pahatu, nu teu boga pamatuhan geuwat disambat.

¹³Jalma-jalma anu dijait ku kuring, kacida tumarimana, kitu deui randa-randa, ku kuring disarenangkeun.

¹⁴Dina sagala hal kuring teh lempeng jeung jujur.

¹⁵Keur nu lolong jadi minangka panonna, keur nu gempor jadi minangka sukuna,

¹⁶keur nu malarat jadi minangka bapana. Semah anu eukeur susah ku kuring dibela.

¹⁷Pangagung lalim ku kuring diwarah, nu jadi korbanna dijait disina leupas.

¹⁸Nu diharep salawasna hayang nanjung panjang umur, mun paeh hayang di imah ngarah utama sugema.

¹⁹Harita kuring teh ibarat tangkal, nu akarna juuh ku cai, dahan-dahan jeung daunna cipruk ku ciibun.

²⁰Ku jelema diparuji, pakarepan tara gagal.

²¹Lamun kuring mere luang, jalma-jalma mani jempe, saregep ngabarandungan.

²²Lamun ngomong enggeus anggeus euweuh nu wani nyambungan, tiap ucap keunana nyerep, lir cihujan rembes ka jero taneuh.

²³Nu ngadarengekeunana bangun pohara resepeunana, lir patani narimakeun hujan.

²⁴Samangsa maranehna pegat pangharepan, ku kuring sok diimutan, timbul deui wawanenna mun kuring nembongkeun budi marahmay.

²⁵Urusanana geuwat ku kuring ditangkes tuluy diputus, jelemana dipetakeun, lir balad keur ditata ku rajana. Jalma anu pegat pangharepan dililipur nepi ka teger.