Read Boros Dusun AYUB 30 Bible Online

AYUB 30 - Boros Dusun bible

AYUB 30

¹Na ari ayeuna, ku nu leuwih ngarora ge diseungseurikeun. Bet inget ka kolot-kolotna, kabeh jalma tanpa guna. Leuheung keneh anjing kuring, aya-aya gawena purah ngajaga domba.

²Naon maranehna mah, jelema ge ruruntukna, diarah tanagana bororaah, kacida halengkerna.

³Ku miskin-miskinna, ku lapar-laparna, akar-akar garing ge disaregetan, ti peuting, di tengah tegal gundil,

⁴nyarabutan tutuwuhan tegal, diharakan ka akar-akar tangkal nu euweuh rasana.

⁵Ku itu ku ieu dibuburak, dieuah-euah kawas ka bangsat.

⁶Hareesna di nu nyangkeredong-nyangkeredong, atawa ngalaliang dina lamping karang,

⁷tingsalegor kawas sato bae badis, bacacar di handapeun rurungkunan.

⁸Manusa piceuneun wungkul, teu paruguh indung bapana, dibuburak ti jero lembur.

⁹Eta nu karitu patut, ayeuna mah ka kuring nyeungseurikeun mani nganggap bodor.

¹⁰Bangun kacida sarebeleunana. Tapi ceuk pangrasana mah sakitu teh bageur teuing, da nepi ka nyariduhan kana beungeut.

¹¹Meureun meungpeung kuring ku Allah dikieu-kieu, nya geus teu walakaya, nya geus beak araheunana, maranehna sakama-kama mupuas ka kuring.

¹²Seug eta gorombolan teh narajang, ngabeberik teu eureun-eureun,

¹³maregatan arek mergasa, taya nu ngahalang-halang.

¹⁴Maranehna ambreg kana lombang pertahanan kuring, ditenjragan nepi ka runtuh.

¹⁵Cindekna kuring teh eleh, sieunna kabina-bina, beak wawanen kapupul bayu. Asal mukti geus burindil, lir mega kasapu angin.

¹⁶Ayeuna mah kari nunggu-nunggu ajal taya harepan kana menyat deui.

¹⁷Ari peuting karasa satulang-tulang nyareri, mani asa dikerikan teu eureun-eureun.

¹⁸Sabot kitu, beuheung baju ku Allah ditongtak, tuluy dipuril-puril,

¹⁹terus kuring dibalangkeun ka nu jeblog, taya bedana ti miceun runtah.

²⁰Ka Allah abdi ngagero, nanging teu diwaro. Ka Gusti abdi jumerit, nanging teu ditolih.

²¹Gusti bengis liwat saking, nyiksa pupuasan.

²²Ku Gusti diapung-apung, atuh kabantun ku angin, dibuntang-banting ku topan.

²³Teu sak deui, tangtos bade dicabut nya umur, bade ditotogkeun ka kubur, pangbalikan sarerea.

²⁴Na ku naon dugi ka nyiksa ka nu parantos teu walakaya, anu parantos teu tiasa naon-naon, kajabi ti neda dipikarunya.

²⁵Padahal abdi kapungkur, ka nu prihatin sok ngiring sedih, ka nu tunggara ngiring sungkawa.

²⁶Nu diteda, bagja katut jamugana, nu katampi, papait sareng balai.

²⁷Awak bejad, dijejewet ku karisi jeung kanyeri, nu kapeleng mung wungkul pisangsaraeun.

²⁸Titingalan parantos paroek, gegerungan menta tulung, sasambat ka nu araya, nanging lapur taya anu ngalilipur.

²⁹Sora abdi matak ngarakacak hate kawas sora babaungna ajag atawa jeritna manuk onta di tempat sepi tur suwung.

³⁰Kulit jadi hideung, awak nyongkab muriang.

³¹Kapungkur mah sok nguping lalaguan nu gumbira ayeuna mung bati lumengis midangdam.