Read Boros Dusun AYUB 36 Bible Online

AYUB 36 - Boros Dusun bible

AYUB 36

¹Saur Elihu deui,

²”Sabar heula sakedap, dangukeun deui pihatur sim kuring, kalayan pajenengan Allah.

³Pangarti sim kuring teh mahi, ayeuna rek digunakeun, rek dipake nembongkeun yen Allah anu ngajadikeun sim kuring teh estu bener.

⁴Sim kuring sanes rek ngabobodo. Ieu anu dipayunan teh jalmi cekap bijaksana.

⁵Allah teh maha perkasa! Tapi ka jalma teu mandang rendah. Tur keur Mantenna mah taya hal nu teu kahartos.

⁶Mantenna tara ngantep jalma jahat nanjung. Sabalikna anu sangsara mah dibela.

⁷Anu balener dijaga diraksa, sina sajajar jeung raja-raja, sina mulya salalawasna.

⁸Jelema nu dirante, tur sangsara ku pamolahna,

⁹ku Mantenna dibere terang, yen kituna teh ku karana dosana jeung adigungna.

¹⁰Ti dinya digeuing dipepelingan sangkan babalik pikir.

¹¹Anu narurut sarta ngabakti ka Allah, hirupna mukti santosa.

¹²Sabalikna mun ngabaha eta teh tetela bodo, sabab tangtu cilaka tigebrus ka jero kubur.

¹³Mungguh nu henteu malire ka Allah, angger bae murka, dihukum ge pamohalan sasambat ka Allah.

¹⁴Ngora-ngora keneh jiwana geus paeh, ruksak ku laku hirupna nu nista.

¹⁵Manusa ku Allah sok dipeperih, dipaparin kasukeran, eta maksad-Na ngawulang sangkan areling.

¹⁶Bapa ge geus tangtu baris dijait, dipaparin deui kabagjaan, hirup mo aya kakurang.

¹⁷Hukuman anu keur karandapan, eta teh balukarna tina lalampahan.

¹⁸Atos-atos, najan lara ulah dugi ka sasar ucap, ulah nepi ka ngaco ku beuratna sarat.

¹⁹Menta tulung nepi ka jejeritan ge, meak-meakkeun tanaga, moal aya tulungna.

²⁰Peuting tong diarep-arep datang, saʼat pimusnaeunana bangsa-bangsa.

²¹Atos-atos, ulah malikan deui dosa. Kapan nu matak Bapa nandangan lara oge, maksad-Na sangkan ulah dugi ka kitu.

²²Sing emut, Allah teh Maha Kawasa, Allah teh Guru Nu Agung, guru urang sarerea.

²³Moal aya nu bisa nguah-ngieuh ka Mantenna kudu kitu kudu kieu, atawa nyela dadamelana-Na.

²⁴Sagala damel-Na salawasna layak dimulyakeun. Bapa oge kudu ngamulyakeun.

²⁵Sagala tapak damel-Na eces ebreh ka sarerea, tapi saurang ge moal aya nu ngaharti.

²⁶Kaagungana-Na lain jugjug-jugjugeun, kitu deui lawasna Mantenna jumeneng, lain taksir-taksireun.

²⁷Nya Allah nu nyaabkeun cai tina beungeut bumi, lajeng dikucurkeun deui ngajadi hujan.

²⁸Hujan ngucur tina mega mendung, jadi rahmat ka sakabeh manusa.

²⁹Saurang taya terang jalanna mega di awang-awang, kumaha jadina gelap ngabeledag di langit, panglinggihan Allah.

³⁰Kilat sina patingburinyay di angkasa, ari di dasar sagara angger-angger poek ngajumbleng.

³¹Kitu Mantenna ngayakeun jalan geusan ngabayuan manusa, keur nyayagikeun dahareunana kalawan taya kakurang.

³²Kilat ditewakan, digenggem, lajeng ditimbalan sangkan nyamber titik tujuan.

³³Lamun gelap ngabeledag, ciciren topan rek datang, dalah sasatoan oge nyaho yen eta teh tandaning topan rek ngamuk.