Read Boros Dusun AYUB 37 Bible Online

AYUB 37 - Boros Dusun bible

AYUB 37

¹Ari aya topan teh sim kuring mah nepi ka sok ratug angen.

²Sorana ngagelebug asal tina baham Allah. Darangukeun! Eta teh gentra Mantenna.

³Jorelat kilat meulah langit, ti tungtung jagat ka tungtung jagat.

⁴Beledag sorana, gelap ngampar handaruan, eta teh gentraning Allah, bareng jeung kilat patingburinyay.

⁵Kalawan timbalan Allah, seug aya nu matak helok, anu aheng henteu kahontal ku akal.

⁶Kalawan timbalana-Na, salju murubut kana taneuh, hujan gede abreg-abregan.

⁷Pagawean manusa kabeh katunda, ku Allah dipegat, sabab Mantenna rek mintonkeun damel-Na anu rongkah.

⁸Margasatwa marubus kana liang atawa guhana.

⁹Ti kidul datang angin topan, ti kaler datang hawa anu kacida matak tirisna.

¹⁰Cai karimpel katiup ku hawa napasing Allah, tuluy padet ngajadi es.

¹¹Kerelep kilat ngaburinyay ti jero mega,

¹²tingjorelat, jalanna nurutkeun timbalan Allah, tunduk kana parentah-Na, sarapat-serepet ka sakuliah jagat.

¹³Allah nurunkeun hujan ka bumi, bisa matak bahla, keur hukuman ka manusa, bisa jadi rahmat, keur nandakeun kurnia-Na.

¹⁴Lenyepkeun, bandungan, Pa Ayub! Manahan eta padamelan Allah nu araheng tea.

¹⁵Kumaha Bapa uninga petaning Allah midamel jeung nimbalan kilat sina ngaburinyay ti jero mega?

¹⁶Kumaha Bapa uninga kaajaiban anu dipidamel ku Allah, sangkan mega patingkalayang di awang-awang?

¹⁷Moal, moal uninga. Ukur bisa ngarasa panasna ngaheab, ana eta mega ngareueukan bumi lantaran katebak angin ti kidul.

¹⁸Sanggup Bapa mantuan Allah mentangkeun langit, nepi ka kuatna lir logam beunang ngecor?

¹⁹Cik sim kuring papatahan, kumaha pokna ari nyanggem ka Allah! Da pikiran urang teh kosong molongpong, moal bisa gunem catur jeung Mantenna.

²⁰Paliyas sim kuring mah nyuhunkeun widi cumarita ka Mantenna, kuriak salah tuluy katulah.

²¹Ayeuna cahaya langit keur bengras, kacida matak serabna kana panon langit lenglang beresih, mega disapu ku bayu.

²²Breh ebreh di beulah kaler cahaya burahay lir emas. Saestuna kamulyaan Allah teh matak ajrih.

²³Sakitu rosana kawasaning Allah, ku urang hamo kasungsi. Ka manusa sipat wijaksana tur adil.

²⁴Pantes saban jalma mikagimir ka Mantenna. Ka nu boga angkeuh pinter Mantenna teu pisan nganggap.”