Read Boros Dusun AYUB 38 Bible Online

AYUB 38 - Boros Dusun bible

AYUB 38

¹Ti dinya PANGERAN ngadawuh ka Ayub ti jero angin ribut, dawuhana-Na:

²”Saha maneh, campelak kana hikmat Kami, make ucap-ucap anu nya bodo nya kosong?

³Maneh geura cengkat, masing cangker sakumaha layakna lalaki. Sing sadia pijawabeun, Kami seja barang tanya:

⁴Geus aya maneh basa Kami ngadegkeun jagat? Lamun enya nyaho, sebutkeun.

⁵Saha anu nangtukeun legana? Saha anu narik tali ukuranana? Eta kabeh, nyaho maneh pijawabeunana?

⁶Kana naon nyeblokna tihang-tihang anu nanggeuy bumi? Saha nu masangkeun batu juru alam dunya?

⁷Poe eta wanci subuhna bentang-bentang ragem ngarawih jeung mahluk-mahluk surga sarurak bungah.

⁸Saha nu ngabendung lawang-lawang sagara basa eta ngagurudag gumelar ti jero kandungan bumi?

⁹Nya Kami. Seug sagara ku Kami disimbutan ku angkeub mendung, dibedong ku mega nu reueuk hideung.

¹⁰Tuluy dibere ciri wawatesanana, dikeureut keur geusan kandeg, lebah tulak lawang-lawang,

¹¹bari ditimbalan, ʼGeus, semet dieu, ulah terus! Lebah dieu angkara ombak maneh kudu eureun.ʼ

¹²He Ayub, kungsi maneh dina salila hirup nitah ka poe sina geura subuh?

¹³Enggeus maneh nitah ka sang pajar, nitah nyekel tungtung bumi, sina ngirabkeun umat doraka anu nyamuni di nu baruni?

¹⁴Ari enggeus bray beurang, gunung-gunung jeung jungkrangna narembongan, tingkarendu jiga lawon ngagunduk kawas anu dicapkeun dina taneuh liket.

¹⁵Cahya beurang keur umat nu jahat mah, pohara matak serabna, geusan nyegah maranehna tina papaksa.

¹⁶Kungsi maneh nincak kana sirah laut, atawa ngajajah dasar sagara?

¹⁷Kungsi ka maneh aya nu ngebrehkeun lawang-lawang, anu brasna ka alam kubur?

¹⁸Boga maneh pangabisa geusan ngukur legana jagat? Jawab, lamun enya nyaho!

¹⁹Nyaho maneh, ti mana asalna caang? Naon ari nu jadi sumbering poek?

²⁰Bisa maneh nuduhkeun ka dinya kudu nepi ka mana majuna, atawa nitah sina baralik deui ka urut inditna?

²¹Tangtuna moal teu nyaho da geus sakitu kolotna. Maneh teh lain dijurukeun samemeh alam dunya digelarkeun?

²²Kungsi maneh ngalanglangan gudang salju jeung hujan es?

²³Eta ku Kami dihaja disimpen, geusan dikaluarkeun dina usum werit, dina usum perang jeung usum jurit.

²⁴Kungsi maneh ngadongdon tempat bijilna sang surya, atawa ka pangancikan gelebugna angin ti wetan?

²⁵Saha nu nyieun wahangan keur nadah cihujan? Saha nu naratas pijalaneun kilat jeung guludug?

²⁶Saha nu nurunkeun hujan ka tempat suwung taya jalmaan?

²⁷Saha nu nginuman tanah anu nya keri nya garing, nepi ka jujukutan jararadi?

²⁸Ari hujan atawa ibun bogaeun bapa?

²⁹Saha indungna ari es jeung cai kimpel,

³⁰anu ngalantarankeun cai teuas kawas batu, beungeut sagara jeger kimpel ngajadi es?

³¹Bisa maneh meungkeut Bentang Tujuh jadi saranggeuy, atawa ngudaran panyimpay Bentang Orion?

³²Bisa maneh ngabijilkeun bentang-bentang, luyu jeung usum-usumna, atawa ngangon bentang Biruang nu gede jeung nu leutikna?

³³Nyaho maneh aturan tataning langit? Bisa maneh nerapkeun pangaruhna mega ka bumi?

³⁴Bisa maneh ngageroan mega sarta marentah ka dinya, sangkan nurunkeun hujan geusan nyiram awak maneh?

³⁵Bisa maneh nitah ka kilat sangkan ngerelep, nepi ka kilat teh nyampoyong barina ngomong, ʼNgiringan sakersa Juraganʼ?

³⁶Saha anu ngabejaan manuk waliwis nepi ka nyahoeun yen Walungan Nil baris banjir? Saha anu ngabejaan cangehgar nepi ka nyahoeun yen bakal hujan?

³⁷Ti antara nu pangpinterna, saha nu bisa milang mega mendung, sarta nyolokan sina bocor ngucurkeun hujan,

³⁸sangkan taneuh nu geus ngabata ngajadi ledok?

³⁹Sanggup maneh mangmorokeun mamangsan keur singa, jeung pikeun anak-anakna nu kalaparan,

⁴⁰ana keur kapaksa kudu nararumpi dina dungusna, atawa kudu dararepa dina guhana?

⁴¹Saha nu maraban gagak lapar kumalayang, sarta anak-anakna rarecet patingarenggak ka Kami marenta parab?