Read Boros Dusun AYUB 4 Bible Online

AYUB 4 - Boros Dusun bible

AYUB 4

¹”Ki Sobat! Punten nya, tong ngambek, kuring ayeuna seja nyarita. Geus teu kuat ngabetem salila-lila.

³Anjeun teh tukang wuwuruk, tukang nyangkeh leungeun-leungeun nu ngaraplek,

⁴purah ngeumbing nu tiguling, purah nuyun nu ngudupruk, ngabeberah nu laleuseuh jeung sarusah.

⁵Ayeuna Ki Sobat pisan ngalaman katerap lara, bet aral nandanganana.

⁶Ongkoh Ki Sobat ibadah, taya cawadeun nya lampah. Atuh tong aral subaha, tarimakeun masing pasrah.

⁷Kudu ngeunteung ka nu enggeus-enggeus, na aya jalma ibadah nandang cilaka?

⁸Ana kapanggih ku kuring, pangna jelema meunang cilaka reujeung sangsara, lantaran geus melak dosa, tandur binih kajahatan.

⁹Atuh tangtu Allah bendu, tangtu narajang lir topan, jalma nu kitu digempur.

¹⁰Nu jarahat tinggalaur, tingharegem cara singa, tapi jep ku Allah dibungkem nepi ka jempling, sihungna beak dipingges-pinggeskeun.

¹¹Lir singa taya mamangsan, maranehna tarariwas, anak-anakna paburencay.

¹²Kungsi kuring meunangkeun hiji harewos pituah, pohara launna mehmehan henteu kadenge.

¹³Karasana asa eukeur ngimpi goreng ngaganggu keur hees tibra.

¹⁴Kuring mani ka ngeleper, gumeter, sakujur awak ngadegdeg bawaning ku sieun.

¹⁵Hiliwir aya angin kana beungeut, kuring sumiak muringkak, sabulu-bulu muriding.

¹⁶Breh teh ningali nu ngabelegedeg di hareupeun, dihantem diawas-awas, weleh teu nyaho eta teh naon. Ana ngong aya soara, datangna ti alam jempling.

¹⁷Pokna, ʼTaya jalma nu bener payuneun Allah. Taya jalma nu beresih di payuneun Nu nyiptana.

¹⁸Sadalah abdi-abdi Allah di sawarga, ku Allah taya anu dipercaya. Malah para malaikat, ku Mantenna kapendak aya cacadna.

¹⁹Kumaha pamikir Ki Sobat, na Mantenna rek percaya ka mahluk nu asal tina taneuh lempung, anu asal tina kebul, tur baris ajur lebur lir dihakanan ku geget?

²⁰Manusa mah, isuk-isuk jagjag waringkas, ari sorena kelepek paeh teu kanyahoan.

²¹Sagala nu ngancik dina dirina, les musna tanpa karana. Nepi ka paehna ge tetep henteu nyaho naon-naon.ʼ