Read Boros Dusun AYUB 41 Bible Online

AYUB 41 - Boros Dusun bible

AYUB 41

¹Bisa maneh newak Lewiatan, ditohok atawa dieurad letahna tuluy dibedol?

²Bisa maneh ngerong cungurna ku dadung atawa ngait cacapekna ku ruruhit,

³nepi ka eta lumengis menta dileupaskeun deui, atawa ampun-ampunan menta karunya,

⁴atawa ngikrarkeun akad sumpah yen seja kumawula ka maneh saumur-umur?

⁵Bisa eta teh ku maneh dicocoo kawas manuk ingu, atawa dijieun tongtoneun lanjang-lanjang maneh?

⁶Na eta teh bisa ditatawarkeun ka palika, atawa dijual ka tukang lauk sakeleng-sakeleng?

⁷Na teurak kulitna ditusuk ku trisula atawa ditojos huluna ku tohok?

⁸Pek pangangguran toel, sakali ge maneh kapok, bangbaungeun saumur hirup, mo poho-poho basa keur tarungna!

⁹Kakara ku nenjona ge geus ngalumpuruk, kabur manten pangacian.

¹⁰Ana eta geus culanggeuk, dangongna pikagimireun, bororaah aya nu wani deukeut-deukeut.

¹¹Di sajagat hamo aya nu sanggup tarung jeung eta, bari salamet teu paeh.

¹²Urang tataan ku Kami wincikan anggahotana, sakumaha gagahna, sakumaha rongkah tanagana.

¹³Kulit luarna pamohalan bisa kasebit, pakarang pamohalan aya nu bisa nyempalkeun.

¹⁴Saha nu sanggup nyalawakkeun sungutna, anu ranggeteng ku huntu, sareukeut matak palaur?

¹⁵Tonggongna jeg dilakop ku rebuan batok, teuas alah batan batu, mani kekep parerekep,

¹⁶pateteep raraket padedempet, nepikeun ka hawa ge mo bisa seseleket.

¹⁷Awahing ku kekep jeung rekep, pamohalan aya kulitna nu bisa kabeset.

¹⁸Beresinna mani ngaburinyay, matana moncorong lir surya kakara medal.

¹⁹Bangusna nyebrot hurung, cahayana racleng patingburinyay.

²⁰Irungna gegebosan ngabijilkeun saab, ngelun siga haseup pangdurukan jukut dina pariuk.

²¹Ambekanana ge mani kingkilaban, sungutna mura-murakeun seuneu.

²²Pundukna istuning tangguh, tanggoh lain meumeueusan, anu paamprok tangtu kasima.

²³Kulitna euweuh pisan uduh-uduhna, tarareuas ngabaketrak kawas beusi.

²⁴Hatena teuas jeg batu, tara kaeunteupan sieun, teuas padet kawas batu panggilingan.

²⁵Ana jung ngajurungkunung, jalma anu panggagahna ge kasima, hareugeueun, leungit tanagana.

²⁶Pedang nambag, tumbak nyoledat, jamparing teu mahi, tohok moyodok, sagala pakarang taya nu teurak.

²⁷Beusi dianggap jarami, tambaga dianggap pangpung bobo.

²⁸Cadu lumpat ku dipanah, katimbul batu asa katinggang kalakay.

²⁹Gada dianggap panggere, dilempag kalah ka genaheun.

³⁰Sisitna rareges, reregean jiga pepecahan beling, ana ngorondang, leutak ambacak kacakar.

³¹Laut dikubek digibeg-gibeg, mani ngagolak lir keur ditaheur, tingburial tingberekbek jeg minyak ngagolak dina kancah.

³²Alur urutna boborelakan, laut ngabudah mani bodas saluluar.

³³Eta mahluk istuning euweuh kasieun, di sajagat sepi tanding tuna lawan.

³⁴Sato anu panggagahna ge ku eta mah teu dianggap, kawantu Lewiatan mah rajaning sato galak.”