Read Boros Dusun AYUB 6 Bible Online

AYUB 6 - Boros Dusun bible

AYUB 6

¹”Duka lara diri kuring, mun ditimbang ku taraju,

³beurat alah batan keusik sapanjang basisir. Piraku henteu kamaʼlum, lamun kuring tadi kalepasan omong.

⁴Awak katiir jamparing Allah Nu Maha Kawasa, peurahna nyaksrak saluar awak. Diri diambreg ku sagala pirentageun anu diatur ku Allah.

⁵Kalde, ari keur ngagabres jukut tara hohoang, sapi, najan nyatuan jukut garing tara emoh-emohan.

⁶Tapi cik, saha nu beuki kadaharan anu hambar teu diuyahan? Naon ngeunahna endog bobodasna wungkul?

⁷Dahareun jiga kitu, kuring mah henteu hayang-hayang acan, didahar ge kalah ka sebel.

⁸Ku naon atuh pamenta kuring ku Allah henteu dikabul? Ku naon atuh panyambat kuring henteu didangu?

⁹Kahayang teh bek bae kuring ku Mantenna paehan.

¹⁰Lamun bek mah ku Mantenna dipaehan, meureun emprak awahing ku atoh-atohna, keun bae nyerina mah moal dirasa. Da nyaho Allah mah suci, sagala timbalana-Na ku kuring hamo dilawan.

¹¹Naon nya tanaga nu matak kuring hirup bae teh? Keur naon dihirupan ge, ari euweuh arep-arepeunana deui mah?

¹²Na diri kuring teh tina batu, awak kuring teh tina tambaga?

¹³Kuring geus teu daya teu upaya, tapi ka saha nya menta tulung, ka ditu suwung ka dieu suwung.

¹⁴Waktu keur sangsara kieu, boh ninggalkeun Allah, boh henteu, kuring teh butuh sobat sajati.

¹⁵Ari heug aranjeun mah, anu majar nyobat, bet lain puntanganeun, jeg walungan keur katiga mani ngoletrak.

¹⁶Jeg walungan anu katutup ku es jeung salju,

¹⁷ari geus kapanasan bet ngadak-ngadak saat, dasarna mani ngoletrak.

¹⁸Kapilah bati kokolopokan neangan cai, ubak-ubek di gurun keusik nepi ka paraeh pating golepak.

¹⁹Kapilah ti Syeba reujeung ti Tema, gura-giru maruru eta walungan.

²⁰Ari datang les musna harepanana, nempo walungan garing ngoletrak.

²¹Tah aranjeun ka kuring ge jeg walungan siga kitu, nenjo nasib kuring kieu teh ngajenghok sieun.

²²Na kuring bieu ka anjeun teh pepentaan? Atawa menta dipangnyogokkeun si Anu?

²³Atawa menta dibela sangkan rahayu, boh ti musuh, boh ti jalma anu telenges?

²⁴Pek, kuring papatahan, tuduhkeun naon kasalahanana, kuring rek cicing, rek ngaregepkeun.

²⁵Omongan anu ihlas mah matak sugema. Tapi eta anu keur diomongkeun ku anjeun teh omong kosong.

²⁶Omongan kuring ku anjeun dianggap angin, tapi ari kuring humandeuar bet ditempas!

²⁷Balikanan anjeun, ka budak pahatu ge tega ngalotrekeun nasibna ku ngalung dadu. Malah ka sobat dalit ge tega meres keneh bae, da hayang beunghar.

²⁸Bisi pajarkeun bohong, yeuh teuteup beungeut kuring.

²⁹Geus kacida ngalanturna omongan anjeun teh. Meujeuhna eureun tina micatur anu teu bener. Ari ieu bet kuring nu disalahkeun, padahal kuring nu bener.

³⁰Tapi kitu tea bae, ceuk pamikir anjeun mah keukeuh kuring nu teu bener, keukeuh nyangka yen kuring teu nyaho bener jeung salah.