Read Boros Dusun AYUB 9 Bible Online

AYUB 9 - Boros Dusun bible

AYUB 9

¹”Enya, kuring ge geus nyaho. Piraku manusa bisa ngalawan Allah?

³Na aya nu bisa ngalawan ka Mantenna? Mantenna iasa merekpek ku sarebu pertanyaan, hiji ge moal aya nu kajawab ku manusa.

⁴Allah ieuh, nya pinter nya Maha Kawasa, pamohalan jelema teh kuat ngalawan.

⁵Ana Mantenna geus bendu sok tara tatapasini deui, gunung-gunung digempur sina rarugrug,

⁶bumi digunjang-ganjing ku lini, paseuk-paseuk jagat dicabutan.

⁷Ku Allah mah panonpoe ge dipondah teu bisa bijil, bentang-bentang henteu bisa narembongan.

⁸Mantenna mantengkeun langit, nyalira bae, bari nincak kana tonggong mahluk sagara.

⁹Di langit ngagantungkeun bentang: Bentang Biruang, Bentang Orion, Bentang Tujuh, Bentang Kidul.

¹⁰Padamelana-Na nu araheng ku urang henteu kaharti, mujijat-Na teu aya wates wangenna.

¹¹Mantenna aya ngalangkung, tapi ku kuring teu katenjo.

¹²Ari enggeus mikapalay, naon ge dicandak, taya anu bisa mapalangan, tara aya anu wani tumaros, ʼKeur damel naon?ʼ

¹³Ana bendu sok kadalon-dalon (teu bisa dipondah), musuh-musuhna, nu ngabantu Rahab — si mahluk sagara, nu ngalawan ka Mantenna tea, diremukkeun.

¹⁴Komo kuring, pimanaeun bisa manggih piucapeun keur ngalawan ka Allah?

¹⁵Sanajan kuring bener ge, mo bisa nempas, kalah ka kapaksa menta dipikarunya, ku Mantenna nu mutus perkara kuring.

¹⁶Jeung sanajan ku Mantenna dibere tempo keur ngomong, kuring mah teu percaya yen kersaeun ngadangukeun.

¹⁷Kalah ka teu puguh-puguh, kuring disina dibuntang-banting ku angin topan.

¹⁸Kuring teh teu meunang ngarenghap-ngarenghap acan, sagala damel-Na ka kuring wungkul ngagerihan ati.

¹⁹Kudu maksakeun ngalawan? Ngalawan ka Allah? Arek maksa ngagusur Mantenna ka pangadilan? Saha nu sanggup maksa ka Mantenna?

²⁰Najan kuring bener tur satemenna, ana pok mah ngomong saucap-ucap teh bet salah, saucap-ucap teh matak cilaka bae.

²¹Ayeuna mah, sanajan enya bener ge paduli teuing, da kuringna enggeus bosen hirup. Rek salah rek bener, ku Allah manusa teh teu burung ditumpur.

²³Lamun anu bener tea ngadadak paeh, Allah kalah ka gumujeng.

²⁴Dunya ku Allah geus diserenkeun ka nu jarahat, hakim-hakim sina lolong. Lamun lain ku Allah, ku saha deui?

²⁵Umur kuring ngabelesat siga anu balap lumpat, sapoe ge teu kungsi panggih jeung bagja.

²⁶Lajuna lir parahu balap, rikat alah batan heulang nyamber hayam.

²⁷Sakitu kanyeri dipopohokeun, bari maksakeun diri ngahehegar maneh, karasana kalah ka beuki kasiksa, tetela kuring teh ku Allah tetep dianggap doraka.

²⁹Ku sabab tetep dianggap salah, keur naon atuh nyusahkeun maneh oge?

³⁰Najan dihantem diseretu, diri kuring pamohalan bisa beresih.

³¹Ku Allah ge kalah ka dibalangkeun ka jarian, papakean jarareblog matak gareuleuh.

³²Manasina Allah teh jelema, meureun bisa ditembal dicental, meureun bisa dibawa ka pangadilan, ngarah putus mana nu salah.

³³Kaya kieu mah kuring cekcok jeung Allah teh teu aya nu bisa nyapih, moal aya nu bisa mutus, saha nu salah, kuring atawa Allah.

³⁴Duh Allah, cik ulah kitu-kitu teuing! Nyiksa teh mani pupuasan!

³⁵Teu sieun abdi mah ngomong kitu ge, da ceuk rarasaan mah abdi teh bener!