Read Boros Dusun JABUR 102 Bible Online

JABUR 102 - Boros Dusun bible

JABUR 102

¹Doa ti nu keur lara, keur teu daya teu upaya, anu ngucutkeun eusi hatena ka PANGERAN.

²Nun PANGERAN, mugi dangukeun panyambat abdi, jerit abdi neneda pitulung mugia dongkap ka Gusti;

³mugi Gusti ulah ngalieus, nalika abdi keur sangsara, dangukeun nun Gusti, abdi jumerit, mugi Gusti kersa enggal ngawaler.

⁴Margi umur abdi teh musna lir haseup, sungsum balung asa panas lir diduruk,

⁵awak laleuleus lir jukut garing teu hayang neda-neda acan.

⁶Abdi mung tiasa udah-aduh, awak ngajangjawing, kantun kulit sareng tulang.

⁷Abdi lir manuk di gurun keusik, lir bueuk di ruruntuhan sepi.

⁸Ngagoler teu daek sare, kawas manuk nyorangan di suhunan imah.

⁹Sadidinten hantem bae dicacampah ku musuh, ngaran abdi dijarieun panyumpahan ku sugri nu mikaijid.

¹⁰Tedaeun abdi sanes sangu nanging lebu, inumeun pacampur sareng cipanon,

¹¹da ku Gusti sakitu dibenduanana sareng disiksana, dugi ka dijeuwang lajeng digejretkeun pisan.

¹²Umur abdi lir kalangkang wanci tunggang gunung, abdi teh lir jukut garing.

¹³Nanging nun PANGERAN, Gusti mah jumeneng Raja salalanggengna, jenengan Gusti tetep baris dipiemut, turunan nema turunan.

¹⁴Gusti tangtos bijil nembongkeun kawelas ka Sion, parantos waktosna eta teh dipikawatir, nya ayeuna mangsana.

¹⁵Eta teh sanaos parantos burak-barik, tetep dipikacinta ku sadaya abdi Gusti, sanaos eta teh kantun ruruntuk, tetep ku maranehna dipikawatir.

¹⁶Bangsa-bangsa baris gimir ku PANGERAN, raja-raja di bumi sadayana bakal rentag ku kakawasaana-Na.

¹⁷Lamun PANGERAN geus ngawangun deui Sion, kaagungan Mantenna bakal diebrehkeun.

¹⁸Mantenna bakal malire umat-Na anu geus teu dipirosea, paneda maranehna baris didangu.

¹⁹Tuliskeun sakur anu geus dipidamel ku PANGERAN, pikeun turunan nu bakal datang, supaya jalma-jalma nu ayeuna tacan lahir engke maruji ka Mantenna.

²⁰PANGERAN ningali ka handap ti tempat suci-Na di luhur, ningali ka bumi di handap, ti sawarga.

²¹Mantenna ngadangukeun udah-aduhna para tahanan, jeung ngaleupaskeun anu meunang hukum pati;

²²Ku sabab kitu jenengana-Na bakal dimashurkeun di Sion, Mantenna bakal diparuji di Yerusalem,

²³lamun bangsa-bangsa jeung karajaan-karajaan bareng daratang, sarta ngabarakti ka PANGERAN.

²⁴Tanaga kaula ku PANGERAN dileumpeuhkeun ngora-ngora, umur kaula ku Mantenna dipondokkeun.

²⁵Nya kaula sasambat: ”Nun Allah, mugi abdi ulah dicandak satengahing umur.” Nun PANGERAN, Gusti teh jumeneng langgeng,

²⁶kapungkur ngadegkeun bumi, langit oge hasil damel panangan Gusti;

²⁷eta bakal keuna ku musna, nanging Gusti mah langgeng jumeneng sapapaosna, eta sadayana bakal bobo kawas lawon, sarta ku Gusti disingkirkeun lir baju butut, ahirna musna,

²⁸dupi Gusti mah tetep henteu robah-robah, hadirat Gusti teu aya tamatna.

²⁹Anak incu abdi-abdi Gusti tiasa hirup tengtrem, sarta turunan maranehna ge bakal aman, ku karana pangraksa Gusti.