Read Boros Dusun JABUR 103 Bible Online

JABUR 103 - Boros Dusun bible

JABUR 103

¹Ti Daud. Mulyakeun PANGERAN, he nyawa, mulyakeun sakuat-kuat jenengana-Na nu suci!

²Mulyakeun PANGERAN, he nyawa, jeung ulah poho, kumaha saena Mantenna.

³Mantenna ngahampura sakabeh dosa kaula, nyageurkeun sagala panyakit kaula.

⁴Ngajaga kaula tina liang kubur, sarta ngaberkahan kaula kalayan asih jeung welas.

⁵Mantenna ngeusian hirup kaula ku hal-hal anu harade, nepi ka kaula awet ngora tur rosa tanaga kawas galudra.

⁶PANGERAN geus maparin kaadilan, jeung ngabela hak sakur nu dikaniaya.

⁷Maksad Mantenna ku Mantenna geus diterangkeun ka Musa, padamelan-padamelana-Na geus dipintonkeun ka kaom Israil.

⁸Estu PANGERAN teh welas asih, lautan kurnia, sabar adil palamarta, sarta jembar hampura-Na,

⁹tara terus nyeuseul salawasna, tara terus bendu salalanggengna;

¹⁰ngahukumna ge tara diukur-ukur kana dosa urang, tara diijir-ijir kana kadorakaan urang;

¹¹malah saenyana mah, sakumaha jauhna tanah ka langit, nya sakitu rosana kawelasana-Na ka sakur anu hormat ka Mantenna teh.

¹²Sakumaha anggangna wetan ti kulon, nya sakitu jauhna dosa-dosa urang dijauhkeunana ti urang.

¹³Sakumaha bapa nyaaheun ka anakna, PANGERAN teh nyaaheun ka sakur anu hormat ka Mantenna.

¹⁴Mantenna uninga kana bahan asal urang, kaemut yen urang teh saukur lebu.

¹⁵Urang mah, hirup urang lir ibarat jukut, sirungan jeung ngagedean kawas kembang tegalan,

¹⁶les bae euweuh, katiup ku angin, moal katenjo-tenjo deui.

¹⁷Tapi ka sakur nu hormat ka PANGERAN mah asih-Na teh langgeng, sarta kasaeana-Na tumuluy ka sakabeh turunan,

¹⁸jalma-jalma anu nyekel jangji Mantenna, jeung anu gumati kana timbalana-Na.

¹⁹PANGERAN ngadegkeun tahta-Na di sawarga, Mantenna raja anu murba wisesa.

²⁰Mulyakeun PANGERAN, he para malaikat anu garagah perkosa, anu narurut ka pangersa Mantenna, anu gumati kana saungeling dawuhana-Na.

²¹Mulyakeun PANGERAN, he wadya balad sawargawi, he para kawula-Na, anu ngemban pangersa-Na.

²²Mulyakeun PANGERAN, he sakabeh mahluk Mantenna di sakabeh tempat bawahan pamarentahana-Na, mulyakeun PANGERAN, he nyawa!