Read Boros Dusun JABUR 105 Bible Online

JABUR 105 - Boros Dusun bible

JABUR 105

¹Mulyakeun PANGERAN, sambat jenengana-Na, mashurkeun padamelana-Na ka sakumna umat;

²sanggakeun pupujian jeung lalaguan ka Mantenna, caritakeun sagala karyana anu pikahelokeun.

³Kudu bungah yen urang teh umat kagungana-Na, sakur nu ngabakti ka PANGERAN sing suka ati.

⁴Kudu neneda ka PANGERAN katut pangawasa-Na, salawasna ulah jauh ti hadirat-Na.

⁵Sing aringet kana mujijat-mujijat Mantenna nu enggeus- enggeus, kitu deui kana tanda-tanda aheng jeung hukum tina lambe-Na,

⁶he turunan Ibrahim, abdi-Na, he rundayan Yakub, anu ku Mantenna kapilih!

⁷Mantenna teh PANGERAN, Allah urang, timbalan Mantenna tumerap di sakuliah jagat.

⁸Mantenna salalanggengna ge satia kana jangji-Na, timbalan nu dikeunakeun ka sarebu turunan,

⁹jangji anu ku Mantenna disimpay sareng Ibrahim, jeung anu dijadikeun sumpah ka Isak,

¹⁰oge eta jangji-Na teh dibeungkeutkeun ka Yakub jadi papagon, sarta dijadikeun jangji anu langgeng ka Israil,

¹¹kieu dawuhana-Na harita: ”Maneh rek dibere tanah Kanaan, jadi milik pusaka keur maneh.”

¹²Harita bilangan umat Allah saeutik keneh, masing sakumbuhan leutik tur ayana di dunyana ukur numpang,

¹³jeung masih pipindahan ti nagara ieu ka nagara itu, ti karajaan ieu ka karajaan itu.

¹⁴Tapi sing saha bae ku Mantenna teu diantep nganiaya maranehna, raja-raja nu nyusuker ka maranehna ku Mantenna dibendon,

¹⁵timbalana-Na: ”Ulah wani-wani ngagunasika umat pilihan Kami, sarta nabi-nabi Kami teu meunang diganggu.”

¹⁶Waktu eta nagara ku Mantenna digebug ku paceklik, sarta saniskara bahan dahareun dimusnakeun,

¹⁷Mantenna ngiangkeun heula hiji jalma pikeun jadi jalan, nya eta Yusup, ku jalan dijual jadi abdi;

¹⁸anjeunna dibelok, sampeanana dibangbaluhan, dikongkorongan rante beusi,

¹⁹nepi ka cunduk waktuna, panorahna ngabukti, cocog sakumaha pituduh PANGERAN ka anjeunna.

²⁰Tuluy raja Mesir, ngaluarkeun anjeunna ti jero panjara, eta pangereh bangsa-bangsa teh ngabebaskeun anjeunna.

²¹Tuluy disina ngajalankeun pamarentahanana, dikawasakeun marentah sakuliah nagri,

²²kawasa ka para ponggawa raja, sarta wenang marentah ka para jurunasehat raja.

²³Ti dinya Yakub sumping ka Mesir, tanah Ham, sarta lajeng matuh bubuara di dinya,

²⁴ku Mantenna dikersakeun jadi jembar baranahan, malah jadi leuwih kuat batan satruna.

²⁵Pikir satruna ku Mantenna dirobah jadi ijid ka umat-Na, abdi-abdi Mantenna ku maranehna ditipu diperdaya.

²⁶Mantenna ngutus Musa, abdi-Na, disarengan ku Harun, anu kapilih ku Mantenna.

²⁷Aranjeunna ngayakeun tanda-tanda aheng tumut sapituduh PANGERAN, jeung mujijat-mujijat di sakuliah tanah Mesir tea.

²⁸Mantenna nurunkeun pepeteng, reup poek ngajumbleng; tapi bangsa Mesir tetep wangkelang kana timbalana-Na.

²⁹Mantenna ngarobah sakabeh cai di sakuliah tempat di dinya, ngajadi getih, laukna disina paraeh,

³⁰geus kitu tanahna sina pinuh ku bangkong, malah pinuh nepi ka karaton raja.

³¹Allah nimbalan, breng laleur jeung rambetuk nararapuk di sakuliah nagri.

³²Hujan di eta nagri ku Mantenna dirobah jadi hujan es jeung kilat.

³³Pelak anggurna, pelak kondangna, diburak-barik, kakayon-kakayon dirungkad-rungkadkeun.

³⁴Mantenna nimbalan, brul datang simeut, lobana tanpa wilangan;

³⁵ngaharakanan sakabeh pepelakan di eta tanah sakabeh hasil bumi beak digalaksak.

³⁶Mantenna maehan sakabeh anak cikal lalaki ti unggal kulawarga urang Mesir.

³⁷Lajeng umat-Na dicandak budal, rebo ku emas perak, tur kabeh sarehat marulus.

³⁸Sanggeus maranehna budal, urang Mesir barungah hatena, sabab geus baroga rasa sieun ku maranehna teh.

³⁹PANGERAN meberkeun mega pikeun jadi iuh-iuh, jeung ngayakeun tihang seuneu pikeun nyaangan ari peuting.

⁴⁰Maranehna neneda, Mantenna ngadatangkeun aleutan puyuh, sarta maranehna dipiseubeuhan ku roti ti sawarga.

⁴¹Mantenna meulah karang, golontor kaluar cai, terus ngocor di gurun keusik kawas walungan.

⁴²Eta lantaran Mantenna ngemutkeun jangji suci-Na ka Ibrahim abdi-Na.

⁴³Kitu Mantenna nuyun umat-Na budalan, sarta maranehna nyaranyi, sarurak.

⁴⁴Ku Mantenna dipaparin tanah bangsa-bangsa lian, lahan-lahanna dimilikkeun ka maranehna tea,

⁴⁵sangkan maranehna tuhu kana hukum-hukum-Na, jeung ngestokeun sagala parentah Mantenna. Mulyakeun PANGERAN!