Read Boros Dusun JABUR 115 Bible Online

JABUR 115 - Boros Dusun bible

JABUR 115

¹Sanes abdi-abdi, nun PANGERAN, nu kedah diagungkeun teh mung Gusti nyalira, ku karana kaasih sareng kasatiaan Gusti taya kendatna.

²Ku naon bangsa-bangsa make naranya, ”Mana Allah maraneh teh?”

³Allah urang aya di sawarga, nu iasa ngadamel naon bae sakersa-Na.

⁴Aallahan maranehna mah tina perak, tina emas, bubuatan leungeun jelema.

⁵Sungutan tapi teu lemek, mataan tapi teu nenjo,

⁶ceulian tapi teu ngareungeu, irungan tapi teu ngambeu,

⁷leungeunan tapi teu bisa rarampa, sukuan tapi teu bisa leumpang, genggerongan tapi teu bisaeun nyoara.

⁸Sing cara kitu sakur anu nyarieunna jeung anu nyarembahna, sing cara arca-arca bubuatanana.

⁹Sing percaya ka PANGERAN, eh urang Israil! Mantenna nulungan jeung nangtayungan ka maraneh.

¹⁰Sing percaya ka PANGERAN, eh imam-imam Allah! Mantenna nulungan jeung nangtayungan ka aranjeun.

¹¹Sing percaya ka PANGERAN, eh nu nyarembah ka Mantenna! Mantenna nulungan jeung nangtayungan ka maraneh.

¹²PANGERAN emut ka urang; sarta baris ngaberkahan ka urang, baris ngaberkahan ka urang Israil, jeung ka para imam Allah.

¹³Mantenna baris ngaberkahan sakur anu hormat ka Mantenna, boh nu gede boh nu leutik.

¹⁴Mugia maraneh dibarere anak ku PANGERAN, boh maraneh, boh turunan maraneh.

¹⁵Mugia maraneh diberkahan ku PANGERAN, anu ngadamel langit jeung bumi!

¹⁶Langit keur PANGERAN nyalira, tapi bumi mah ku Mantenna diserenkeun ka manusa.

¹⁷PANGERAN henteu dipuji ku nu geus paraeh, ku nu geus tarurun ka enggon nu simpe.

¹⁸Tapi urang, anu harirup, kudu muji sukur ka Mantenna, ti ayeuna nepi ka salalanggengna. Agungkeun PANGERAN.