Read Boros Dusun JABUR 132 Bible Online

JABUR 132 - Boros Dusun bible

JABUR 132

¹Lagu paranti jarah. Nun PANGERAN, mugi emut ka Daud sareng sagala kasangsaraanana.

²Mugi emut kana jangjina kapungkur, panadaranana ka Gusti, Nu Maha Kawasa, Allah Yakub:

³”Kami moal waka ka imah atawa ka enggon,

⁴moal waka ngaso atawa mondok,

⁵lamun tacan mangnyieunkeun tempat pikeun PANGERAN, hiji gedong pikeun Nu Maha Kawasa, Allah Yakub.”

⁶Di Betlehem urang geus ngareungeu hal Peti Perjangjian, sarta eta ku urang kapanggih di tegal Yarim.

⁷Ceuk urang, ”Hayu urang ka gedong PANGERAN, urang ngabakti hareupeun tahta Mantenna.”

⁸Mangga atuh GUSTI, sumping ka Bait Gusti sareng Peti Perjangjian, lambang kakawasaan Gusti, nun PANGERAN, linggih di dieu salamina.

⁹Mugi imam-imam Gusti salamina ngalampahkeun anu bener, mugia umat Gusti sarurak!

¹⁰Gusti ngayakeun perjangjian ka Daud, abdi Gusti, mugi eta raja pilihan Gusti teh ulah ditolak, nun PANGERAN.

¹¹Gusti parantos sumpah ka Daud, hiji jangji anu ku Gusti hamo dibatalkeun: ”Kami baris ngangkat anak maneh saurang, jadi raja, sina marentah sanggeus maneh.

¹²Upama anak-anak maneh gumati kana perjangjian Kami, jeung kana parentah-parentah nu ku Kami diparentahkeun, anak-anak maranehna oge salawasna bakal jaradi raja ngaganti maneh.”

¹³PANGERAN geus milih Sion, geusan jadi panglinggihana-Na:

¹⁴”Nya di dieu Kami rek matuh salawasna, nya di dieu tempat Kami marentah.

¹⁵Sion sina lubak-libuk, sagala kaperluanana rek dicukup, pakir miskinna sina sareubeuh dahar.

¹⁶Imam-imamna rek diberkahan dina sagala gawena, umatna disina nyaranyi jeung surak.

¹⁷Di dieu Kami rek ngangkat saurang ti turunan Daud, sina jadi raja gede, sarta pamarentahanana rek disina langgeng.

¹⁸Karajaanana rek disina jembar raharja, sabalikna, musuh-musuhna rek disina nandangan kaera.”