Read Boros Dusun JABUR 139 Bible Online

JABUR 139 - Boros Dusun bible

JABUR 139

¹Pikeun pamingpin biduan. Jabur Daud. Nun PANGERAN, Gusti parantos nguji diri abdi sareng uninga ka abdi.

²Gusti uninga kana sagala rupi anu dilampahkeun ku abdi, ti nu tebih Gusti waspaos kana pipikiran abdi.

³Boh abdi keur digawe, boh keur reureuh, ku Gusti abdi katingali, sagala tingkah polah abdi kauninga.

⁴Malah Gusti uninga kana pisanggemeun abdi memeh ku abdi dikedalkeun.

⁵Di mana-mana di sakurilingeun abdi, Gusti aya, kakawasaan Gusti ngaraksa.

⁶Kauninga Gusti perkawis abdi pohara jerona, henteu kahontal ku akal.

⁷Ka mana abdi tiasa indit nyingkiran Gusti? Ka mana abdi tiasa ngejat ti hadirat Gusti?

⁸Ngungsi ka langit, Gusti aya di dinya, nyempod ka alam maot, Gusti aya di dinya.

⁹Hiber ka beh ditueun wetan, atanapi matuh di peuntas pangjauhna di kulon,

¹⁰Gusti aya di dinya baris nungtun abdi, Gusti aya di dinya baris nulungan abdi.

¹¹Upami abdi menta ka poek sina moekan, atanapi menta ka caang sina jadi peuting,

¹²poek oge keur Gusti mah henteu poek, wengi oge sami caang sapertos siang. Poek sareng caang keur Gusti mah sami bae.

¹³Gusti nu nyipta saban babagian raga abdi, Gusti nu merenahkeun, anu ngawangunna dina kandungan pun biang.

¹⁴Abdi muji sukur ka Gusti, Gusti estu luar biasa sugri damel Gusti ajaib, pikahelokeun; eta abdi terang pisan.

¹⁵Waktos tulang-tulang abdi dirakit, ati-ati diteundeun di jero kandungan pun biang, waktos abdi kalayan rasiah tumuwuh di dinya, Gusti uninga yen abdi aya di dinya.

¹⁶Memeh abdi lahir ku Gusti parantos katingali. Poe-poe pikeun abdi parantos diserat dina kitab Gusti, samemeh eta poe-poe ngawitan.

¹⁷Mamanahan Gusti keur abdi kacida muskilna, nun Allah, kacida seueurna!

¹⁸Upami eta kedah dietang, seueurna sami sareng keusik. Barang lilir, tetep we abdi teh di Gusti keneh.

¹⁹Nun Allah, kacida abdi ngarep-ngarepna supados anu jarahat teh ku Gusti dipaehan! Kacida abdi ngarep-ngarepna supados anu barengis teh undur ti abdi!

²⁰Maranehna ngagogoreng ka Gusti, ngaromongkeun jahat jenengan Gusti.

²¹Kacida abdi ijidna ka jalma-jalma anu ijid ka Gusti! Kacida teu resepna abdi ka jalma-jalma nu ngalawan ka Gusti!

²²Geuleuhna nataku ka nu karitu teh maranehna teh musuh, dianggapna ku abdi.

²³Pariksa diri abdi, rahrah pipikiran abdi, nun Allah, uji, bolekerkeun eusi hate abdi.

²⁴Kotektak bilih di dinya aya kajahatanana teras tungtun abdi ka jalan nu langgeng.