Read Boros Dusun JABUR 147 Bible Online

JABUR 147 - Boros Dusun bible

JABUR 147

¹Puji PANGERAN! Sabab muji ka Allah teh hade, muji ka Mantenna teh estu bener tur matak resep.

²PANGERAN ngadegkeun deui Yerusalem, mulangkeun urang ti pangbuangan.

³Hate nu ancur ku Mantenna disina cageur, raheut-raheutna dibeberan.

⁴Bentang-bentang ku Mantenna dipasti jumlahna, sarta masing-masing dipaparinan ngaran.

⁵Gusti urang teh hebat jeung agung kabijaksanaana-Na teu aya wates-wangenna.

⁶Kaom lemah ku Mantenna dicengkatkeun, sabalikna nu jahat mah ku Mantenna diidek dina taneuh.

⁷Sanggakeun kidung pamuji ka PANGERAN, tabeuh kacapi pikeun Allah urang.

⁸Mantenna nyebarkeun mega di awang-awang, ngayakeun hujan keur nyiraman bumi, melakan pasir-pasir ku jujukutan,

⁹Mantenna maparin parab ka sasatoan, maraban anak gagak anu disarada marenta.

¹⁰Karesep PANGERAN lain kuda nu baredas, lain prajurit nu gagah wani;

¹¹karesep-Na teh nya eta anu hormat ka Mantenna, anu ngaharep kana satia asih-Na.

¹²Puji PANGERAN, he Yerusalem! Puji Allah maneh, he Sion!

¹³Sabab Mantenna geus nohagakeun panto gapura maneh, ngaberkahan rahayat maneh.

¹⁴Mantenna ngajadikeun daerah maneh aman jeung kerta, sarta nyukup ka maneh ku gandum anu pangalusna.

¹⁵Mantenna maparin parentah ka bumi, sarta naon bae sapangandikana gancang ngajadi.

¹⁶Mantenna ngamparkeun salju lir simbut, nyebarkeun halimun anu kawas lebu.

¹⁷Mantenna nurunkeun hujan es lir batu karikil, taya nu kuat nangankeun tirisna!

¹⁸Sarta ku parentah-Na keneh eta es teh leyur, Mantenna niup angin, cor cai ngalocor.

¹⁹Mantenna maparin amanat ka umat-Na, maparinkeun parentah jeung hukum-Na ka Israil.

²⁰Bangsa-bangsa sejen taya anu dipaparinan saperti kitu, maranehna mah teu nyarahoeun kana hukum-hukum Mantenna. Puji PANGERAN!