Read Boros Dusun JABUR 148 Bible Online

JABUR 148 - Boros Dusun bible

JABUR 148

¹Puji PANGERAN! Puji PANGERAN ti sawarga, ku aranjeun, nu araya di tempat luhur.

²Puji Mantenna, he para malaikat-Na, puji, he wadyabalad sawarga.

³Puji Mantenna, he bulan jeung panonpoe, puji, he bentang-bentang anu baranang!

⁴Puji Mantenna, he langit satungkebing langit, puji, he sagala cai di luhur langit.

⁵Puji jenengan PANGERAN ku sakabeh, sabab sakabehna ge dijadikeunana ku pangandika-Na.

⁶Nya ku pangandika-Na sakabehna langgeng merenah satempatna-satempatna, taya nu bisa ngalawan.

⁷Puji PANGERAN, he pangeusi bumi, he mahluk-mahluk raksasa pangeusi laut-laut jeung sagara-sagara;

⁸he kilat jeung hujan es, salju jeung mega, jeung angin topan anu nurut kana parentah-Na.

⁹Puji Mantenna, he gunung-gunung jeung pasir-pasir, he tangkal bubuahan jeung leuweung-leuweung,

¹⁰sato-sato leuweung jeung sato-sato ingu, sato-sato nu ngarayap jeung manuk-manuk.

¹¹Puji Mantenna, he para raja katut bangsa-bangsa, para pangeran jeung para pangereh lianna,

¹²para perjaka jeung para mojang, nu karolot kitu deui barudak.

¹³Kabeh kudu muji jenengan PANGERAN! Sabab jenengan Mantenna leuwih agung ti sakabeh, kaagungana-Na luhureun bumi jeung langit.

¹⁴Mantenna geus nguatkeun bangsa salira-Na, nepi ka Mantenna dipuji ku sakabeh umat-Na, nya eta bangsa Israil, anu kacida diasih ku Mantenna. Puji PANGERAN!