Read Boros Dusun JABUR 21 Bible Online

JABUR 21 - Boros Dusun bible

JABUR 21

¹Pikeun pamingpin biduan. Jabur Daud.

²Nun PANGERAN, raja teh bingah reh ku Gusti dipaparin kakiatan, ngaraos suka reh ku Gusti disina unggul.

³Paneja manahna ku Gusti diridoan, pamundutna ku Gusti ditedunan.

⁴Gusti sumping ka anjeunna, nyandak pirang-pirang berkah, anjeunna dimakutaan ku makuta emas.

⁵Anjeunna mundut hirup, ku Gusti dikabul, malah sina panjang yuswa salalamina.

⁶Ku pitulung Gusti, raja jadi kacida mulyana, disina kamashur sareng agung.

⁷Ku Gusti teu kendat-kendat diberkahan, ku Gusti disarengan, kalintang sukaeunana.

⁸Raja teh muntangna ka PANGERAN Nu Maha Kawasa, sarta ku lantaran terus dipikaasih ku PANGERAN, tangtu anjeunna aman sapapanjangna.

⁹Anjeunna baris ngaboyong musuh-musuhna, ngaboyong sakur anu mikaijid ka anjeunna.

¹⁰Ana anjeunna sumping, maranehna tangtu dibasmi lir ku seuneu ngagebur. Maranehna bakal musna ku amarah PANGERAN, jeung ku seuneu nepi ka beak.

¹¹Turunan maranehna moal aya anu nyesa kabeh bakal dibasmi ku raja.

¹²Musuh ngatur siasat, rek ngalawan ka anjeunna, tapi moal hasil.

¹³Jamparing raja bakal tingbelesat ka maranehna nepi ka maranehna lalumpat kalabur.

¹⁴Abdi sadaya muji Gusti, nun PANGERAN, reh Gusti sakitu digjayana. Abdi sadaya sumeja nyanyi sareng muji kakawasaan Gusti.