Read Boros Dusun JABUR 22 Bible Online

JABUR 22 - Boros Dusun bible

JABUR 22

¹Pikeun pamingpin biduan. Lagu ”Uncal dina wanci pajar”. Jabur Daud.

²Nun Allah, Gusti abdi, ku naon ngantunkeun? Putus harepan abdi, jumerit neda pitulung, nanging pitulung teu dongkap-dongkap.

³Abdi nyambat Gusti sapanjang siang, nun Allah, nanging Gusti teu ngawaler, nyambat Gusti waktos wengi, hate angger henteu tengtrem.

⁴Nanging Gusti teh jadi Raja Anu Suci nu dipuji-puji ku Israil.

⁵Karuhun abdi sadaya ngaharepna teh ka Gusti, maruntangna teh ka Gusti, ku Gusti disalametkeun.

⁶Maranehna sasambat ka Gusti, seug luput tina balahi. Ngaharep ka Gusti, pangharepanana teu mubadir.

⁷Rupina abdi mah sanes jelema deui, cacing, dipoyok, dihina, ku pada jalma!

⁸Nu naringal ka abdi nyaleungseurikeun, ngalelewean sareng ngagodegan.

⁹Carekna, ”Ongkoh maneh percaya ka PANGERAN, geuning ku PANGERAN teu disalametkeun? Ari enya mah sukaeun ka maneh, naha geuning teu nulungan?”

¹⁰Nya Gusti anu ngaluarkeun abdi kalayan rahayu tina kandungan, Gusti nu ngajagi abdi kalayan salamet waktos abdi orok.

¹¹Abdi percaya ka Gusti ti barang lahir sareng nya Gusti anu salamina jadi Allah abdi.

¹²Ulah tebih ti abdi! Abdi nampeu kana pibahlaeun, teu aya deui nu pinulungeun.

¹³Lir banteng-banteng musuh ngaronom lir banteng-banteng galak ti tanah Basan ngadarangong ngepung abdi.

¹⁴Sungutna caralawak, cara singa tinggalaur hayangeun nyasaak.

¹⁵Abdi parantos teu gaduh deui tanaga parantos seep lir cai bahe kana taneuh. Tulang-tulang pasiksak lalocotan hate leyur sapertos lilin.

¹⁶Tikoro garing sakesat lebu, letah rapet kana lalangit. Ku Gusti diantep ngalumbuk dina kekebul, sapertos ka nu parantos lastari.

¹⁷Abdi dirurubung ku gorombolan jalma jahat. Maranehna lir gorombolan anjing, pasesedek ngaronom, ngareweg kana leungeun kana suku.

¹⁸Tulang-tulang abdi tarembong, ditarongton diparerong ku musuh-musuh.

¹⁹Papakean abdi dilotrekeun tuluy dibagi-bagikeun.

²⁰Nun Gusti, ulah tebih ti abdi, enggal sumping, tulungan abdi!

²¹Luputkeun abdi tina pedang, luputkeun nyawa abdi ti eta anjing-anjing.

²²Salametkeun abdi ti eta singa-singa. Nyanghareupan eta banteng-banteng galak, abdi teu tiasa walakaya.

²³Abdi bade nyanggemkeun padamelan Gusti ka rahayat, bade ngamulyakeun Gusti dina pasamoanana:

²⁴”Agungkeun Mantenna, he abdi-abdi PANGERAN! Hormat Mantenna, he turunan Yakub! Sembah Mantenna, he sakabeh turunan Israil!

²⁵Mantenna henteu nyapirakeun anu miskin, henteu nyapirakeun kasangsaraanana, henteu ngalieus ti maranehna, kersaeun ngadangu panyambatna.”

²⁶Anu parantos dipidamel ku Gusti bade dipuji-puji dina kumpulan umat. Di kumpulan jalmi-jalmi anu ngabarakti ka Gusti, abdi nyanggakeun kurban anu parantos diikrarkeun.

²⁷Nu mariskin bakal dalahar nepi ka sareubeuheun. Anu daratang ka PANGERAN bakal maruji ka Mantenna. Mugia maranehna makmur salalawasna!

²⁸Kabeh bangsa bakal aringet ka PANGERAN. Jalma-jalma ti unggal juru dunya bakal tarobat ka Mantenna, sakabeh seler bangsa bakal sarujud ka Mantenna.

²⁹PANGERAN teh raja, ngereh sakumna bangsa.

³⁰Sakur nu aradigung bakal marendek ka Mantenna; manusa pana kabeh bakal sarujud di payuneuna-Na.

³¹Turunan nu engke datang bakal ngarabdi ka Mantenna. Jalma-jalma bakal nyarita hal PANGERAN ka turunanana.

³²Turunan nu bakal keneh, bakal dicaritaan kieu, ”PANGERAN geus nyalametkeun umat-Na.”