Read Boros Dusun JABUR 25 Bible Online

JABUR 25 - Boros Dusun bible

JABUR 25

¹Jabur Daud. Ka Gusti, PANGERAN, abdi ngadongkapkeun panyambat,

²ka Gusti abdi ngaharep, nun Allah panutan. Tebihkeun abdi tina nandangan erana kasoran, ulah dugi ka dipupuas ku musuh!

³Kasoran mah sanes bagian jalmi anu ngarep ka Gusti, nanging bagian anu ngaralawan ka Gusti.

⁴Tuduhkeun ka abdi jalan Gusti, nun PANGERAN, sangkan abdi terang.

⁵Wurukan abdi hal hirup nurutkeun pangersa Gusti, reh Gusti teh Allah anu nyalametkeun abdi, abdi salamina ngaharep ka Gusti.

⁶Sing emut kana kasaean sareng satia asih Gusti, nun PANGERAN, nu parantos dipaparinkeun ku Gusti ti kapungkur keneh.

⁷Dosa sareng kalepatan abdi keur ngora mugi dihapunten. Sing emut ka abdi, nun PANGERAN, ku karana satia asih sareng kasaean Gusti.

⁸Sabab PANGERAN teh saestu tur jembar manah, kersa nuduhan jalan ka anu garaduh dosa.

⁹Nu rarendah hate ku Mantenna dituyun kana jalan bener, diwulang sina terang kana pangersa-Na.

¹⁰Kalayan satia jeung asih Mantenna nuyun ka nu nyarekel perjangjian jeung timbalana-Na.

¹¹Mugi emut kana jangji, nun PANGERAN, hapunten dosa-dosa abdi anu sakitu seueurna.

¹²Sing saha anu ajrih ka PANGERAN, ku Mantenna baris dibere nyaho jalan sorangeunana.

¹³Maranehna salawasna bakal bagja hirupna, anak incuna bakal ngabogaan tanah pusaka.

¹⁴PANGERAN misobat ka anu nurut ka Mantenna, perjangjiana-Na ka maranehna bakal diteguhkeun.

¹⁵Kaula tetep melong ka PANGERAN, menta pitulung-Na seug ku Mantenna diluputkeun tina bahaya.

¹⁶Teuteup abdi, nun PANGERAN, sing hawatos, abdi teh nya nunggelis nya hengker.

¹⁷Luputkeun abdi tina sagala karisi, jait tina karurupek.

¹⁸Parios kaprihatinan sareng kasesah abdi, hapunten sadaya dosa abdi.

¹⁹Tingali, musuh abdi sakitu seueurna sareng sakitu ijideunana.

²⁰Tangtayungan abdi, tulungan, sangkan ulah kasoran. Nya ka Gusti abdi neda pitulung.

²¹Mugia kabageuran sareng kajujuran abdi jadi jalan pisalameteun, ku margi ngaharep ka Gusti.

²²Nun Allah, mugi Israil dijait, leupas tina sagala kasangsaraanana.