Read Boros Dusun JABUR 27 Bible Online

JABUR 27 - Boros Dusun bible

JABUR 27

¹Jabur Daud. PANGERAN teh cahaya jeung kasalametan kaula, kaula teu sieun ku saha-saha. PANGERAN ngaraksa tina sagala bahla, kaula taya karisi.

²Lamun nu jarahat narajang ka kaula, rek maehan, tangtu tisusut terus ngajungkel.

³Najan dikepung ku sakumna balad kaula moal rentag; najan musuh nyerang narajang, kaula tagen ngandel ka Allah.

⁴Kaula geus menta hiji hal ka PANGERAN, ngan sarupa kahayang teh, nya eta hirup saumur-umur di gedong PANGERAN hayang ngarasakeun kasaean Mantenna, sarta bisa nanyakeun pituduh-Na.

⁵Dina waktu keur pakewuh, tangtu ku Mantenna diauban, sangkan tetep aman di jero Bait-Na, sarta diangkat ka gunung karang anu luhur.

⁶Kaula jadi bisa ngelehkeun musuh anu ngepung. Bari surak, kaula arek ngurban di Bait-Na, sarta rek nyanyi, muji PANGERAN.

⁷Dangukeun panyambat abdi, nun PANGERAN! Sing hawatos, mugi kersa ngawaler!

⁸Upami saur Gusti, ”Hiap ngabakti ka Kami,” wangsul abdi tangtos, ”Mangga, nun PANGERAN.”

⁹Gusti ulah nyumput ti abdi! Gusti ulah ngabenduan, abdi ulah dugi ka ditolak. Gusti parantos nulung ka abdi, mugi ulah ngantunkeun, ulah nundung, nun Allah, jurusalamet abdi.

¹⁰Najan upami ku indung bapa ditundung, ku PANGERAN mah tangtu dipulasara.

¹¹Saurkeun, nun PANGERAN, kahoyong Gusti abdi kedah kumaha, tungtun abdi nyorang jalan anu pisalameteun, margi abdi teh seueur musuh.

¹²Abdi ulah diselehkeun ka musuh, anu nyerang ku jalan ngagogoreng sareng ku ancaman-ancaman.

¹³Kaula yakin yen bakal aya keneh umur, bakal ngarasakeun kaasih PANGERAN dina hirup ayeuna.

¹⁴Sing percaya ka PANGERAN, masing teger, masing pangger, sing percaya ka PANGERAN!