Read Boros Dusun JABUR 33 Bible Online

JABUR 33 - Boros Dusun bible

JABUR 33

¹He jalma-jalma saleh, geura surak, ciri bungah ku padamelan PANGERAN. He nu narurut ka Mantenna, puji Mantenna.

²Kudu sukur ka PANGERAN make kacapi, pek nyaranyi keur Mantenna, make tatabeuhan kawat.

³Pujikeun lagu anyar, keur Mantenna, sing pinter ngacapina, pirig ku surak gumbira.

⁴Sabda PANGERAN teh saestu, sugri nu dipidamel-Na taya kuciwana.

⁵PANGERAN cinta kajujuran jeung kaadilan, dunya pinuh ku murah asih-Na.

⁶PANGERAN ngajadikeun langit ku pangandika-Na, panonpoe, bulan, bentang-bentang, jadina ku dawuhana-Na.

⁷Laut-laut ku Mantenna dihijikeun, disatempatkeun samudra ditahan sina ngabendung.

⁸Bakti PANGERAN, he jagat sakuliahna! Hormat Mantenna, he pangeusi dunya!

⁹Waktu Mantenna ngandika, jleg dunya ngajadi; ku parentah Mantenna, jleg saniskara ngabukti.

¹⁰PANGERAN ngagagalkeun tarekah bangsa-bangsa, pakarepan maranehna kabeh jadi gaplah.

¹¹Ari tarekah PANGERAN mah tetep langgeng, tujuana-Na tetep sapanjang jaman.

¹²Bagja bangsa nu migusti ka Allah PANGERAN, bagja jalma anu ku Mantenna dijieun umat-Na.

¹³PANGERAN ngawaskeun ti sawarga, nitenan sakumna umat manusa.

¹⁴Ti tahta-Na, Mantenna neuteup nelek-nelek ka sakur nu kumelip di bumi.

¹⁵Mantenna nu ngukir hate manusa, uninga ka sugri paripolahna.

¹⁶Unggulna raja lain ku sabab kuat baladna, unggulna prajurit lain dumeh bedas tanagana.

¹⁷Kuda perang moal matak unggul perang, najan gede tanagana, moal matak nyalametkeun.

¹⁸PANGERAN nitenan ka nu nurut ka Mantenna, ka nu ngaharep kana satia asih-Na.

¹⁹Maranehna tangtu diraksa tina baya pati, diraksa jeung dihirupan mangsa kalaparan.

²⁰Urang kudu ngaharep ka PANGERAN; Mantenna teh panyalindungan jeung panulung urang.

²¹Urang bungah ku karana Mantenna, sarta percaya kana jenengana-Na nu suci.

²²Nun PANGERAN, sarengan abdi sadaya ku satia asih Gusti, margi mung ka Gusti abdi-abdi nya muntang.