Read Boros Dusun JABUR 34 Bible Online

JABUR 34 - Boros Dusun bible

JABUR 34

¹Jabur Daud, waktu pura-pura owah hareupeun Abimelek nepi ka diusir tuluy angkat.

²Kaula seja nganuhunkeun ka PANGERAN saban waktu, moal eureun muji Mantenna.

³Seja muji sugri padamelana-Na, sina kadenge ku nu keur diteungteuinganan, malar hatena lipur.

⁴Hayu urang ngembarkeun kaagungan PANGERAN, urang bareng muji jenengana-Na!

⁵Kaula sasambat ka PANGERAN, ku Mantenna diwaler, dibebaskeun tina sagala kasieun.

⁶Nu dikaniaya ngaharep ka PANGERAN, hatena jadi bungah pangharepanana hamo gaplah.

⁷Nu balangsak teh sasambat ka Mantenna, seug dikabul, dibebaskeun tina karupekanana.

⁸Anu ajrih ka PANGERAN, dijaga ku malaikat-Na, dijait tina bahaya.

⁹Pek rarasakeun, kumaha saena PANGERAN. Bagja jalma nu nyalindung ka Mantenna.

¹⁰Sing hormat ka PANGERAN, he sakabeh umat-Na! Nu satuhu ka Mantenna moal aya kakurang.

¹¹Singa aya kalana lapar teu beubeunangan, tapi nu taʼat ka PANGERAN mah, moal nyorang kakurangan.

¹²He para rumaja, ka darieu regepkeun, Bapa rek papatah hal hormat ka PANGERAN.

¹³Maraneh harayang hirup senang? Harayang panjang umur jeung hirup genah?

¹⁴Ulah goreng ucap jeung ulah bohong.

¹⁵Jauhan kajahatan, lampahkeun kahadean usahakeun karapihan sakuat tanaga.

¹⁶PANGERAN nitenan ka jalma bener, tur ngadangukeun panyambatna,

¹⁷tapi ka nu jarahat mah Mantenna ngalawan anu matak nu jarahat mah lamun geus maraot, gancang dipopohokeun.

¹⁸Mun jalma bener nyambat ka PANGERAN, ku Mantenna tangtu didangu, jeung dijait tina kasusahna.

¹⁹PANGERAN teh raket ka jalma nu remuk hate nyalametkeun ka nu pegat pangharepan.

²⁰Jalma bener memang loba kasusahna, tapi pasti ku PANGERAN dijait tina sakabeh karerepetna.

²¹Ku PANGERAN diraksa sagala-galana, sahiji ge tulangna moal aya nu potong.

²²Anu jahat mah tangtu paeh ku kajahatanana, anu mikageuleuh ka nu bener, pinasti dihukum.

²³PANGERAN ngaraksa umat-Na, nu nyalindung ka Mantenna pinasti ditangtayungan.