Read Boros Dusun JABUR 37 Bible Online

JABUR 37 - Boros Dusun bible

JABUR 37

¹Ti Daud. Ulah salempang ku lampah jalma jahat, ulah kabita ku talajak jalma goreng.

²Nu kararitu lir jukut garing kahalodoan, ibarat dangdaunan alum ngajadi kalakay.

³Sing percaya ka PANGERAN, lampahkeun nu hade pek cicing di lemah cai, sing tengtrem.

⁴Teangan kabagjaan di PANGERAN, angen-angen maneh ku Mantenna baris dicumponan.

⁵Pasrahkeun hirup ka PANGERAN, puntangan piwelas-Na, tangtu nulungan,

⁶lampah bener maneh ku Mantenna bakal disina atra lir panonpoe wanci manceran.

⁷Masing sabar ngadago polah PANGERAN, ulah dengki mun nenjo batur mukti, sarta rarancang jahatna ngajadi.

⁸Ulah ambek atawa panas hate, sabab ngan matak susah bae.

⁹Nu muntang ka PANGERAN baris ngamilik tanah, sabalikna nu jarahat tangtu ku Mantenna ditundung.

¹⁰Nu jarahat bakal gancang musna, barang diteang geus teu araya.

¹¹Demi anu sarareh budi, tangtu bakal kawaris tanah, hirupna senang ngahenang-ngahening.

¹²Anu jahat ngamusuh ka anu bener, mani delek-delek bakat ku ngewa.

¹³Tapi ku PANGERAN mah eta teh digumujengkeun, da geus kauninga yen geus tereh ditumpurkeun.

¹⁴Jalma jahat matek pedang, mentang jamparing, rek mergasa nu balangsak, nu walurat, rek ngabinasa ka nu balener lampahna.

¹⁵Tapi maranehna bakal paraeh ku pedangna sorangan, gondewa-gondewana paringges.

¹⁶Najan saeutik, rejeki jalma bener mah leuwih maslahat, batan kakayaan tina ladang kajahatan;

¹⁷sabab kakuatan jalma jahat ku PANGERAN bakal dipinggeskeun, ari mungguh jalma bener ku Mantenna tangtu dideudeul.

¹⁸Hirupna jalma ibadah ku PANGERAN diraksa diriksa, sarta tanah milikna tangtu kapiboga salalawasna.

¹⁹Dina musim werit hamo nepi ka walurat, dina usum tigerat hamo nepi ka kurat-karet.

²⁰Sabalikna nu jarahat pasti paraeh, musuh PANGERAN bakal musna cara kembang tegal, ilang musna cara haseup.

²¹Jalma jahat ana nginjeum tara mulangkeun, sabalikna jalma bener mah karunyaan jeung berehan.

²²Nu diberkahan ku PANGERAN tangtu bakal ngamilik tanah, sabalikna nu ku Mantenna disapa, tangtu baris disingkahkeun.

²³PANGERAN nungtun hirup jalma di jalan sorangeunana, nangtayungan ka sakur anu kamanah ku Mantenna.

²⁴Lamun maranehna labuh, moal ngudupung bae, sabab tangtu ku PANGERAN dihudangkeun deui.

²⁵Ti ngongora tepi ka kolot kieu, acan kungsi kaula nenjo jalma bener diantep ku PANGERAN, nepi ka anak incuna kapaksa jajaluk menta dahareun.

²⁶Malah sabalikna anggur barisa mere maweh, tutulung ka nu barutuh, turta anak incuna ngajadi berkah.

²⁷Ku kituna nu goreng kudu disinglar, nu hade hempek lampahkeun, malar turunan bisa matuh tengtrem-tingtrim salalawasna.

²⁸Sabab PANGERAN asih ka sakur jalma bener, umat nu satia ku Mantenna hamo ditilar, nu saratia tangtu diraksa salalawasna, sabalikna turunan jalma jahat mah tangtu ditundung.

²⁹Nu balener bakal kawaris tanah pusaka, tur matuhna di dinya moal incah balilahan.

³⁰Jelema bener nyaritana wijaksana, satincak-tincakna jujur satarabasna.

³¹Hatena kaancikan timbalan PANGERAN, rengkak polahna hamo ingkar ti dinya.

³²Anu jahat gawena ngintip-ngintip ka nu bener, neangan jalan hayang maehan.

³³Tapi karepna kitu teh moal bisa, sabab teu kawidian ku PANGERAN. Sanajan jalma bener nepi ka kudu jagrag ka pangadilan, PANGERAN hamo ngantep nepi ka manehna meunang hukuman.

³⁴Masing ngaharep ka PANGERAN, mangka tumut kana timbalana-Na, tangtu ku PANGERAN dikuatkeun geusan bisa miboga tanah pusaka, sarta maneh baris puas hate nenjo nu jarahat dibuburak.

³⁵Kungsi kaula nenjo aya jalma jahat jeung lalim, hirupna subur makmur jeg tangkal kiputri di Libanon;

³⁶tapi barang diilik deui, geus euweuh, diteangan weleh teu kapanggih.

³⁷Pek bandungan nu ibadah, nu bener, jalma resep rapih mah turunanana ge tangtu rendey.

³⁸Sabalikna nu boga dosa tangtu diancurkeun, sarta turunanana tangtu disingkirkeun.

³⁹Jalma bener ku PANGERAN disalametkeun, diraksa dina mangsa meunang tunggara.

⁴⁰Ku PANGERAN ditulungan, dirahayukeun, diluputkeun ti nu jarahat lantaran nyalindung ka Mantenna.