Read Boros Dusun JABUR 38 Bible Online

JABUR 38 - Boros Dusun bible

JABUR 38

¹Jabur Daud, waktu nyanggakeun kurban pangeling-eling.

²Nun PANGERAN, sanaos bendu ge Gusti ulah dugi ka ngahukum ka abdi.

³Abdi raraheut disabetan ku jamparing Gusti, nepi ka ngarumpuyuk.

⁴Ku amarah Gusti, abdi nandangan kanyeri ku tina dosa sorangan, sakujur awak teu aya anu walagri.

⁵Abdi titeuleum dina caahna dosa sorangan, anu nindihna kacida abotna.

⁶Lantaran tina kabodoan sorangan, raheut abdi jadi borok pinuh ku nanah.

⁷Abdi dibengkungkeun, digencet, sadidinten humaregung.

⁸Awak direrab ku muriang, parantos sahoseun maot.

⁹Parantos payah, ajur sama sakali, hate nalangsa, bati humaregung gegerungan.

¹⁰Nun PANGERAN, Gusti uninga ka anu diharep ku abdi harurung abdi ku Gusti tangtos kadangu.

¹¹Hate ratug keketegan, tanaga leungit pisan, panon surem teu cahyaan.

¹²Sobat sareng tatangga arembungeun deukeut dumeh abdi rujit ku kasakit, malah kadang warga ge narebihan.

¹³Nu harayangeun maehan abdi marasang jiretna, nu harayangeun nyilakakeun, ngati-ngati bade numpes; maranehna teu eureun-eureun sapongkol ngarah ka abdi.

¹⁴Nanging abdi lir anu torek, anu teu tiasa ngareungeu, lir anu pireu, anu teu tiasa ngomong.

¹⁵Abdi lir jalma anu teu tiasa ngabantah lantaran teu tiasaeun ngareungeu.

¹⁶Nanging abdi percaya ka Gusti, nun PANGERAN, yen Gusti tangtos kersa ngawaler ka abdi, nun PANGERAN, Allah abdi!

¹⁷Ulah dugi ka musuh ngarasa senang dumeh abdi susah, ulah dugi ka maranehna garumede dumeh abdi ambrug.

¹⁸Abdi parantos meh rubuh, kanyeri teu aya kendatna.

¹⁹Abdi ngangken dosa-dosa, dosa anu ngalantarankeun hate paur.

²⁰Musuh-musuh abdi jaragjag sareng baredas, seueur anu ngarewaeun ka abdi teu puguh-puguh.

²¹Jalma-jalma anu ngabales kahadean ku kajahatan, ngamusuh ka abdi, dumeh abdi usaha milampah bener.

²²Abdi ulah dikantun, nun PANGERAN, ulah tebih ti abdi, nun Allah panutan.

²³Enggal abdi tulungan, ayeuna, nun PANGERAN jurusalamet abdi!