Read Boros Dusun JABUR 42 Bible Online

JABUR 42 - Boros Dusun bible

JABUR 42

¹Pikeun pamingpin biduan. Lagu atikan ti golongan Korah.

²Lir uncal kangen kana cai tiis di susukan, nya kitu abdi kangen ka Gusti, nun Allah!

³Kitu hanaangna hate abdi ka Gusti, Allah nu jumeneng. Iraha abdi kedah indit ngabakti, marek ka Gusti?

⁴Beurang peuting abdi ceurik, tedaeun ge mung cipanon; musuh hantem bae nyalindiran, ”Mana Allah maneh teh?”

⁵Ari ras ka alam ka tukang, hate mani ngarakacak inget bareto sok milu ngaleut ka gedong Allah, ngapalaan aleutan jalma rea, anu galumbira, nyaranyi, maruji ka Allah.

⁶Ku naon kaula sakieu nalangsana? Ku naon sakieu sedihna? Kaula neundeun harepan ka Allah, jeung sakali deui rek muji ka Mantenna, jurusalamet jeung Allah kaula.

⁷Di dieu, di pangbuangan, hate kaula ajur seug nginget-nginget deui Mantenna. Sukma kaula ku Mantenna diteunggar ku ombak kasedih, diamuk ku caah kalang kabut, ngaguruh sada curug ngagurujug ka Walungan Yordan, ti Gunung Hermon jeung Gunung Misar.

⁹Muga ti beurang PANGERAN nembongkeun satia asih-Na, supaya peutingna kaula bisa nyanyi, jeung neneda ka Allah sumber hirup kaula.

¹⁰Kaula unjukan ka Allah, nu jadi pananggeuhan, ”Ku naon Gusti tega ka abdi? Ku naon abdi kedah sangsara, kedah dikaniaya ku musuh?”

¹¹Hate kaula nyelekit ngadenge panghina maranehna, anu teu eureun-eureun nyindiran, ”Mana Allah maneh teh?”

¹²Ku naon kaula sakieu nalangsana? Ku naon sakieu sedihna? Kaula neundeun harepan ka Allah, jeung sakali deui rek muji ka Mantenna, jurusalamet jeung Allah kaula.